بو مراجعت‌نامه ایله فیرقه او واختادک آپاردیغی مقدماتی ایش‌لره خاتمه وئریب، رسمی و علنی صورتده فعالیته باشلادیغینی عموم خالقا بیلدیرمیش اولدو. او گونه‌دک ایستر آذربایجاندا، ایسترسه آذربایجانین خارجینده حزب، مراجعت‌نامه انتشار وئرمک، دسته‌لر دوزلدیب، تظاهر ائده‌رک، خالق نامیندان عادی بیر حال آتدیغینا گؤره فیرقه مؤسسه‌لری‌نین بعضی‌سی بیزیم مراجعت‌نامه‌نین دا سس-صداسیز کئچمه‌سینی حدس ووروردولار. بعضی‌لری ده اونون ملّی روحدا یازیلیب، بیرینجی دفعه اولماق اوزره آذربایجان خالقی اوچون آزادلیق، مختاریًت طلب ائتدییینی نظرده توتاراق بؤیوک طوفان قوپاراجاغینا(ایناملی) ایدیلر. خوشبختانه عملده آخیرینجی نظر دوغرو چیخدی. معین بیر گونده بوتون آذربایجانین شهر و قصبه‌لرینده انتشار تاپان بو مراجعت‌نامه خالق طرفیندن بؤیوک علاقه و رغبت‌له قارشی‌لاندی. ایش قاباقدان دقت و علاقه ایله تشکیل اولوندوغوندان دئمک اولار کی، همین ۱۲شهریور گونو بوتون آذربایجاندا اونو اوخومایان ساوادلی بیر آذربایجانلی قالمادی. خالقین[ذهنینه ده] بیزیم گؤردویوموز تدبیرلر ده چوخ درین تاثیر باغیشلادی. قاباقدان حاضیرلانمیش نقشه اوزره سایی چوخ محدود اولان فیرقه عضولری‌نین همان گون بوتون شهر و قصبه‌لرده حاضیر اولوب، مراجعت‌نامه‌نی دیوارلارا یاپیشدیردیقدان سونرا اونون اطرافیندا خالقا مفصّل صورتده معلومات وئرمه‌لری چوخ فایدالی بیر ایش ایدی. حتی قزوین، تهران، رشت، مازندران جماعتی‌نین اکثری همن بیرینجی رسمی قدمی چوخ مکمل صورتده اجرا ائدیلیب، فوق‌العاده یاخشی نتیجه وئردی.
۱۲ شهریور ساعات ۲ گون‌اورتادان سونرا ۱۵ مین نسخه‌دن بیر دنه ده اولسون باقی قالمادیغیندان، اونو ایکینجی دفعه چاپ ائتمه‌یه مجبور قالدیق. مراجعت‌نامه‌نین تأثیری و خالقین اونا نسبت گؤستردییی رغبتی‌نین اندازه‌سینی بیلمک اوچون ۲ گون سونرا، یعنی شهریورین ۱۴-ده منتشر اولان آذربایجان درگی‌سی باش مقاله‌سینده یازدیغیمیز آشاغی‌داکی جمله‌لره دقت یئتیرمک لازیمدیر.
«دوشنبه گون فیرقه‌میزین مراجعت‌نامه‌سی انتشار تاپدی. بو مراجعت‌نامه خالقیمیز طرفیندن گئنیش توجّه و بؤیوک رغبت‌له قارشی‌لاندی. مین‌لرجه آذربایجانلی آذربایجان شهرینده مراجعت‌نامه یاپیشدیریلمیش دیوارلارین قاباغیندا توپلانیب، اورک دؤیونن سسی ایله اونو اوخودو، دوشوندو، آلقیشلادی….»
بو واسطه ایله سعادت و آزادلیق اوچون یول آچیلدیغینی حسّ ائتدی. بو ایستی استقبال و حرارتلی توجّه گؤستردی کی، توتدوغوموز یول دوز و انتخاب ائتدیییمیز هدف دوغرودور.
یوخاریداکی مراجعت‌نامه‌نین جمله‌لرین خالق ایچری‌سینده بؤیوک ماراق و هوس‌له قارشی‌لانیب دقت‌له اوخوندوغونو گؤستردییی حالدا، اونون انتشاریندان سونرا مختلف طبقه‌لر طرفیندن گؤندریلن تبریک تئلگراف‌لاری و فیرقه عضوونون درخواست‌لاری چوخ درین بیر صورتده تأثیر باغیشلادیغی آشکارا چیخارتدی. میثال اوچون فیرقه‌نین ایل‌دؤنومو مناسبتی‌له نشر ائتدییی ۱۲ شهریور کیتابی‌نین بو خصوصدا وئردییی ایضاحاتی بوردا درج ائدیریک:
«مراجعت‌نامه‌نین انتشاری آذربایجاندا بؤیوک بیر حادثه ایدی. شهریوردن اول اونون اؤزو اطرافا گؤندریلدییی اوچون آذربایجانین هر طرفیندن تئلئگرافلار سئل کیمی آخماغا باشلادی. ایل‌لر بویو آزادلیق عشقی‌یله یانیب یاخیلان کندلی‌لر بو تئلئگرافلار واسطه‌سی‌یله اؤزلری‌نین دموکرات پارتی‌سینه الحاقلارینی(قاتیلماق) اعلام ائتدیلر. بو تئلئگرافلار فوق‌العاده ماراقلی سندلردیلر. اونلارین بعضی‌سینده یوزدن زیادا امضا واردیر. بوتون شهر، قصبه، حتی کندلریمیزده بئله شهریور گون‌لرینده بؤیوک حرکت وجوده گلدیییندن، مراجعت‌نامه‌میزین انتشاریندان ۲ گون سونرا منتشر اولان آذربایجان درگی‌سی‌نین صحیفه‌لری بیرینجی نمره‌دن باشلایاراق، تبریک تئلئگرافلاری ایله دولماغا باشلادی. مثلا، بو درگی‌نین ایکینجی شماره‌سینده فقط اهر، جلفا، مرنددن گؤندریلن تئلئگرافدا ۸۷ امضا وار ایدی(همین بو نمره‌ده تبریر، خوی، مرند، ماکو، شاهپور(سلماس)، سولدوز، مراغه‌دن اولماق اوزره اهالی‌نین مختلف طبقه‌لری مخصوصاً یازیلمیش سککیز فقره عموم تئلئگرافلار درج ائدیلمیشدیر)».
ایکینجی نمره‌ده ایسه تئلئگرافلارین امضالایانلارین سایی ۲۵۱، ایکینجی شماره‌ده ۷۵۰-یه بالغ امضا اولموشدور. بو گئدیش ایله فیرقه‌نی استقبال ائدنلرین سایی بیر هفته‌نین ایچری‌سینده حیرت‌آور بیر صورتده آرتیب، خالقین کوتله‌وی شکیلده فیرقه سیرالارینا داخیل اولماق هوسی میدانا چیخمیشدی. همان درگی‌نین اوچونجو صحیفه‌سینده تهران، مراغه، آذرشهر، شبستر، اورمیه، میانداب، اهر، عجبشیر و قزوین‌دن اولماق اوزره ۲۷فقره تئلئگراف چاپ اولونموشدور. ۱۲ شهریور کتابچاسیندا قید ائدیلدییی کیمی بو تئلئگرافلاردا ۷۰۰-دن زیاده سرشناس آذربایجانلی امضاسی نظری جلب ائتمکده‌دیر. هله امضا ائدنلرین چوخوسو بؤیوک بیر عده‌نین نمونه‌لری حساب اولونوردو.
قایناق: میر جعفر پیشه‌وری- حادثه‌لر و خاطره‌لر/ ۶۶-جی صحیفه
