«اينكلوزيو توپلوم فوندو» ايراندا آذربايجان تورك‌لرينه قارشی انسان حاق‌لاری پوزونتولاری باره‌ده يئنی راپورت‌لارینی ياييب
آمئریکا بیرلشمیش دؤولت‌لرینده يئرلشمیش «اينكلوزيو توپلوم فوندو» ۲۰۲۵-جی ایلین بيرينجی و ایکینجی اوچ‌آیی (يانوار–مارت و آپریل-اییون آي‌لاری) عرضينده ايراندا آذربايجان تورك‌لرينه قارشی باش وئرن انسان حاق‌لاری پوزونتولارینی سندلشديرن يئنی راپورت‌لارینی یاییملاییب.
راپورت‌لاری بورادان اوخویا بیلرسینیز:
ايراندا آذربايجان تورك‌لری ايله باغلی انسان حاق‌لاری راپورتو (يانوار–مارت ۲۰۲۵)
ایراندا آذربایجان تورک‌لری ایله باغلی انسان حاق‌لاری راپورتو (آپرل–اییون ۲۰۲۵)
بیرینجی اوچ آیین راپورتوندا بیلدیریلیر کی، بو دؤورده ۸ نفر ساخلانیلدیقدان سونرا آزادلیغا بوراخیلیب، ۱۶ نفر ایسه ایجتیماعی و یا مدنی فعالیت‌لرینه گؤره حبس جزاسی آلیب. یانوار-مارت آرالیغیندا ان آز ۱۶ نفرین اعدام ائدیلدیگی قید اولوب. ایکینجی اوچ آیین راپورتوندا ایسه بیلدیریلیب کی، بو دؤورده ان آز ۲۰ نفر ساخلانیلدیقدان سونرا آزادلیغا بوراخیلیب، ۸ نفر ایسه فعالیت‌لرینه گؤره حبس جزاسی آلیب. ان آز ۱۳ نفر ایسه آپریل-اییون آرالیغیندا اعدام ائدیلدیگی قید اولونوب. بو، بین‌الخالق ایجتیماعیتین اعدام جزاسی‌نین لغوی ایله باغلی آرتان چاغیریش‌لارینا باخمایاراق، ایران حاکیمیتی‌نین بو جزانی ایستیفاده ائتمکده ایصرارینی گؤستریر.
یانوار-مارت آی‌لاری راپورتوندا همچنین فعال‌لارا قارشی زوراکیليق و قورخوتما مقصدیله حیاتا کئچیریلن هوجوم و دؤیمه حادیثه‌سی ايله یاناشی، ایکی نفرین تهلوکه‌سیزلک قؤو‌ه‌لری طرفیندن هده-قورخویا معروض قالماسی و دیندیریلمه‌یه چاغیریلماسی فاکت‌لاری دا سندلشدیرلیب. آپریل-اییون آی‌لاری راپورتوندا ایسه یئنی دوغولموش اوشاق‌لارین دوغوم شهادت‌نامه‌لرینین وئریلمه‌مه‌سی ایله باغلی ناراحات ائدیجی حال‌لارا دا دقت چکلیب. خصوصاً ائتنیک آزلیق‌لار آراسیندا بو سندین آلینماسیندا قارشیلاشیلان چتینلیک‌لر، اوشاق‌لارین تعلیم، ساغلیق و وطنداشلیق حاق‌لارینا چیخیشینی محدودلاشدیران جدی انسان حاق‌لاری پوزونتوسو کیمی دیرلندیریلیب. راپورت دؤورونده ان آز ۷ یئنی دوغولموش اوشاغا دوغوم شهادت‌نامه‌سی وئریلمه‌ییب.
اینکلوزیو توپلوم فوندو بیلدیریر کی، بو حال‌لار ایراندا آذربایجان تورک‌لرینه قارشی حیاتا کئچیریلن سیستئماتیک رئپرسییالاری و دؤولت سوییه‌سینده آیری‌سئچکیلیگین داوام ائتدیگینی آشکار گؤستریر. فوند بین‌الخالق ایجتیماعیتی ایران حاکیمیتینه قارشی تضییق‌لری گوجلندیرمه‌یه، اعدام‌لاری دایاندیرماغا، اوشاق حاق‌لارینی تامین ائتمه‌یه و عدالتلی محکمه سیستئمینی یاراتماغا چاغیریر.
اینکلوزیو توپلوم فوندو آزلیق‌لارین حاق‌لارینی مودافیعه ائدن، آمئریکا بیرلشمیش دؤولت‌لری مرکزلی غیردولتی تشکیلات‌دیر. فوند انسان حاق‌لاری، ایجتیماعی–سیاسی و چئوره مسئله‌لر ساحه‌سینده تدقیق‌لر آپاریر و متمادی اولاراق راپورت‌لار درج ائدیر. علاوه معلومات اوچون تشکیلاتین رسمی وب سایتینا داخیل اولماق مومکوندور:
www.inclusivevision.org
