۱324-جو ایلده آذربایجان میللی حکومتی دؤورونده گونئی آذربایجان قادین‌لاری ایلک دفعه سس‌وئرمه حقوقو الده ائتدیلر. او دؤورده نشر ائدیلمیش آذربایجان قزئتینده آذر آیینین 6-دن 10-ا قدر ۵ گون عرضینده تبریز شهری و اونون اطرافیندا کئچیریلمیش سس‌وئرمه‌ده قادین‌لارین ایشتیراکی ایله باغلی یازی درج ائدیلیب. قزئتین 16 آذر ۱324-جو ایلده چیخمیش ۷۳-جو ساییندا تبریزین موختلیف محله‌لرینده قادین‌لارین سس‌وئرمه‌ده ایشتیراکی ایله باغلی آمار درج ائدیلیب.
آذربایجان میللی مجلیسی‌نین بیرینجی چاغیریش سئچکی‌لرینده تبریزین مرکزی و اطرافیندا سئچکی منطقه‌لرینده سس‌وئرمه‌ده ایشتیراک ائتمیش قادین‌لارین سایی:
۱. مرکزی سئچکی منطقه‌سی – ۵۰۰
۲. چرنداب و لیلاباد سئچکی منطقه‌سی – ۴۵۹
۳. قاراملیک و شامقازان سئچکی منطقه‌سی – ۱۴
۴. دوه‌چی و سیرخاب سئچکی منطقه‌سی – ۵۰۶
۵. امیره‌قیز و چوست‌دوزان سئچکی منطقه‌سی – ۱۵۶
۶. خیابان و مارالان سئچکی منطقه‌سی – ۷۵
۷. باغمئشه و ویلانکوه سئچکی منطقه‌سی – ۲۶۲
۸. حؤکم‌آباد و آخونی سئچکی منطقه‌سی – ۵۲۱
درج ائدیلمیش آمارا اساساً تبریز و اطرافینداکی سئچکی منطقه‌لرینده عمومیلیکده ۳۱۷۲ قادین سس وئریب.
آذربایجان قزئتی‌نین ۶۹-جو ساییندا بو حاقدا یازیلان مقاله‌نی اتک‌یازی اوخوجولارینا تقدیم ائدیریک.
آذربایجان قزئتی
سایی ۶۹، بازار ائرته‌سی(دوشنبه)، ۱۲ آذر ۱۳۲۴-جو ایل
بیرینجی دفعه اولاراق آذربایجان خانیم‌لاری سئچکی‌لرده ایشتیراک ائتدیلر
ظلم، اسارت، ایستیبداد و زورون پنجه‌سی آلتیندا قارا چادرالاردا بوتون اجتماعی حقوق‌لاردان محروم اولان شرق قادینی اولان آذربایجانلی باجی‌لاریمیز، هر بیر زحمته قاتلاشان، قوینوندا گئجه سحره قدر بیزلری بسله‌ییب بؤیودن آنالاریمیز بو بدبخت و بو فلاکت حالیندا بیزیم کیشی‌لریمیزدن داها چوخ علمدن، معاریفدن محروم اولموشلار. ارتجاع بیزیم غیرتلی، ناموسلو آنا-باجی‌لاریمیزین اوزونه علم، مدنیت قاپی‌لارینی باغلامیش، اونلاری بوتون بشر حقوق‌لاریندان محروم ائدیب زاواللی، بیچاره حالینا سالمیشلار.
آنا نه قدر حؤرمتلی، نه قدر احتیراملیدیر. آنالار اولمازسا، کاینات یاشاماز. بشر نسلینین ان یوکسک بیر گؤوهری وارسا، او دا آنادیر.
آروادلارین کیشی‌لرله برابر حقوقا مالیک اولماسی و سئچکی‌لرده ایشتیراک ائتمه‌سی تزه بیر مسئله دئییلدیر.
دونیانین بیر سیرا دموکراتیک اؤلکه‌لرینده خانیم‌لار اؤز حاق‌لارینا مالیک اولموشلار. یعنی دؤولت ایش‌لرینده ایشتیراک‌لاری وار. بیز بو گون قادین‌لارین سلاح گؤتوره‌رک جبهه‌لرده ووروشمالارینی گؤردوک. گؤی‌لرده اوچان طیاره‌نی، ماشینی ایداره ائد‌ن قادین‌لار واردیر. لاکین بیزیم اؤلکه‌میزده قادین‌لاریمیزی بیچاره و بدبخت ائتمیشلر.
بو گون آذربایجان قادین‌لاری بوتون ایران قادین‌لاری اوچون سعادت قاپی‌لارینی آچماق یولوندا آذربایجانین مرد، قهرمان آزادلیق‌سئورلری کیمی ایلک آددیم‌لارینی آتدیلار. بلی، اولا بیلسین کی، ارتجاع و قارا فیکیرلی آدام‌لار اوچون قادین‌لاریمیزین رای وئرمه‌سی تعجبلو گلسین. لاکین هئچ بیر تعجبون یئری یوخدور.
قادین‌لارین دونیا آزادلیق حرکاتیندا بؤیوک اهمیت‌لری و ایشتیراک‌لاری اولموشدور. یوناندا قادین‌لار ارتجاعچی قوه‌لرله ووروشموش، داش ایله، سلاح ایله دوشمنی ازمیشدیرلر. قادین‌لار جمعیتین اوزونو ایشیقلاندیریر. بو گون آذربایجان خالقی اؤز تاریخینه بیر شئی علاوه ائتدی، او دا آنا و باجی‌لاریمیزین میللی مجلیس وکیل‌لرینه رای وئرمه‌سیدیر. بو دا آذربایجان دموکرات فیرقه‌سینین بیزیم آنا-باجی‌لاریمیزا اولان دقتیدیر. قوی دونیا میللت‌لری ائشیتسین و گؤرسون کی، آذربایجان قادین‌لاری اورک‌لرینده شادلیق و سئوینج دولو حیس‌لرله دسته-دسته اؤز رای‌لرینی مجلیس وکیل‌لرینه وئردیلر.
آنا-باجی‌لاریمیز بونلارلا کیفایتلنمه‌یه‌جکلر. اونلار حتی یئرلی مسئله‌لرین حلی اوچون گله‌جکده اؤزلریندن وکیل‌لر سئچه‌جکلر. قوی آنالاریمیزین طالعی گولسون. بو بوتون ایران خانیم‌لارینا بیر مژده‌دیر.
بونونلا دا آنا-باجی‌لاریمیز اؤز دوغرو و حقیقی حقوق‌لارینی مودافعه ائتمک اوچون تاریخین صحیفه‌لرینه قیزیل خط ایله آدلارینی یازدیلار.
تاریخ همیشه آذربایجان قادین‌لارینین قهرمانلیغینی و آزادلیق‌سئورلرینی قید ائدیب. گله‌جک نسیل‌لریمیز اونلارین بو ایش‌لرینی یاد ائد‌جکلر. خالق شاعری جناب بی‌ریانین قزئتیمیزده چاپ ائدیلن شعرینده شاعیر دئییر کی:
گونش سحر دوغاجاق قطبدن سعادتله
بو گونشلی منظره‌دن قورتولوب شرافتله
همیشه عمر ائلرسن جهاندا آسوده
او شانلی دؤوره فقط حؤکمران اولار توده.
سئویملی شاعیریمیزین سؤزلری آذربایجان دموکرات فیرقه‌سینین بوتون خالقیمیزین و معصوم آنا-باجی‌لاریمیزین اوزونه ساچدیغی گونش‌دیر. خالقیمیز بو غملی فلاکتدن خلاص اولوب اؤز میللی موختاریتینی یارادیب همیشه سعادتله یاشایاجاقدیر
یاشاسین آذربایجانین شرافتلی و ناموسلو آزادیخواه آنا-باجی‌لاری و قیزلاری!
م. طاهیر
