«آوای تبعید» (سورگون سسی) آدلی روبلوک ژورنالین(فصلنامه) یئنی سایی ایشیق اوزو گؤروب. هر ساییدا خصوصی بیر موضوعدان بحث ائد‌ن بو ژورنال ۲۳-جو سایینی تورک ادبیاتی و کولتورو مؤوضوسونا حصر ائدیب و ایکی دیلده نشر اولونوب. بو سایین عرصه‌یه گلمه‌یینده بیر چوخ آذربایجانلی یازیچی دا ایشتیراک ائدیب.
ژورنالین بو سایی ۶ فرقلی حیصه‌دن عبارت‌دیر. بونلار موصاحیبه‌لر و مقاله‌لر، شعر، ویزوال اینجه‌صنعت، حئکایه، سفرنامه و کیتاب‌لار و اونلارین تنقیدی حاقیندا اولان حیصه‌لردیر. ژورنالا یازی تقدیم ائد‌نلرین آراسیندا رضا براهنی، رقیه کبیری، محمد صبحدل، حسن ریاضی، علیرضا اصغرزاده، علیرضا اردبیلی، ایواز طاها، ابراهیم ساوالان، قاسیم تورکان و دیگرلرینین آدینا دا راست گلمک اولار.
ژورنالین بو سایی‌نین الکترون فورماتینی ژورنالین اؤز سایتیندان یوکله‌مک مومکوندور. بونونلا یاناشی ژورنالی آمازون سایتیندان (بو عنواندا: Avaye Tabid: Das Magazin für Kultur und Literatur) و گوته-حافظ نشریاتیندان الده ائتمک مومکوندور.
«آوای تبعید» ژورنالی‌نین سایلاری سورگون ادبیاتی و کولتورونه حصر ائدیلیر. ژورنالین مسئول‌لاری دئییرلر کی: «یالنیز وطندن اوزاق دوشموش اینسانا سورگون ائدیلمیش دئییلمیر، سورگون ائدیلمیش شخص اؤز دیلی، ادبیاتی و کولتوروندن ده اوزاقلاشدیریلا بیلر. شعرینی، ناغیلینی، هنرینی، دوشونجه‌سینی اؤز اؤلکه‌سینده نشر ائده بیلمه‌ین هر کس سورگون ائدیلیب.» بو ژورنال هر کسین باشا دوشدویو سورگون ائدیلمیشلره یوخ، محض اؤز آچیقلامالارینا اویغون سورگون ائدیلمیشلره، شعرینی، اثرلرینی، فیکیرلرینی اؤز اؤلکه‌سینده نشر ائتدیره بیلمه‌ین سورگون ائدیلمیشلره حصر ائدیلیب.
ژورنالین سوروملو رئداکتورو اولان اسد سیف یئنی سایین رئداکتورلوغونو شیوا فرهمنده وئریب.
