«دود، دورو، دورود» آدلی سندلی فیلمین بیرینجی حیصه‌سی «موستند» یوتیوب کانالیندا یایینلانیب. گونئیلی سندلی فیلم رئژیسسورو، گرافیک طراحی و سوسیولوگییا ماذونو محسن هادی بو فیلمینی تراختور فوتبال کومانداسی‌نین کئچدیگی یولا، اؤلکه و دونیا سوییه‌سینده خبر باشلیق‌لاریندا یئر آلماسینا سبب اولان موباحیثه‌لی مؤوضوع‌لارا ایشیق توتماغا حصر ائدیب.
«داش، داش، غالیبیته‌دک»(سنگ، سنگ، تا پیروزی) آدلی بیرینجی بؤلوم تراختورون تهرانین «پرسپولیس» کومانداسی ایله تبریزده کئچیردیگی موسابیقه حاقیندادیر. همین اویوندا تاماشاچی‌لارین میدانا داش آتمالاری نتیجه‌سینده اویون یاریمچیق قالمیشدی. اویون اثناسیندا باش وئرمیش حادیثه‌لر، سونراکی گون‌لرده موختلیف شخص‌لر و قوروم‌لارین رئاکسییالاری بو حیصه‌نین موباحیثه‌یه چکدیگی مسئله‌لردندیر. همچینین بیرینجی حیصه‌ده همین حادیثه اطرافیندا یارانان موباحیثه‌لرین یان کئچدیگی مسئله‌لره ایشیق توتولوب، فارس مئدیاسی‌نین قابارتدیغی نقطه‌لر ایسه بیر داها نظردن کئچیریلیب. بو سندلی فیلم هم ده گؤستریلن رئاکسییالارادا دیقّته لاییق مقام‌لارا توخوناراق، ماراقلی سوال‌لار اورتایا قویوب. اثرین یازیچیسی ایسه سوسیولوگییا اوزره ماذون گونئیلی مهدی حمیدی شفق‌دیر.
فیلمین دیلی فارسجادیر و تورکیه تورکجه‌سی ایله آلت‌یازی ایمکانینا تجهیز ائدیلیب. بو سندلی فیلمین بیرینجی حیصه‌سینی «موستند» آدلی یوتیوب صحیفه‌سینده پولسوز شکیلده ایزله‌مک مومکوندور. «موستند» توپلوم، علم، اینسان‌لار، تاریخ، سیاست و دیگر مسئله‌لر حاقیندا قیسا سندلی فیلم‌لر دوزلتمه‌یی پلانلایان یوتیوب کانالی‌نین آدیدیر.
