«مونولوق»ون اون آلتینجی موصاحیبه‌سینده ، فمینیست فعال و حقوقچو تورکان بوزکورت ، «سپتامبر آیی‌نین ۲۰سیندن باشلایان آیاقلانمالارا قادینلار و گنج قیزلار اؤنجولوک ائتدی. بو پروتئستولارین آذربایجانا یانسیماسی و آذربایجانداکی اؤزللیکلری حاققیندا نه دوشونورسونوز؟»، « آذربایجاندا تورک قادینلارینین دورومونو نئجه دیرلندیریرسینیز؟ سیزجه تورک قادینلاری هانسی باسقی سیستئملرینه معروض قالیبلار؟ سیزجه تورک قادینلاری بو باسقیلارا نئجه، هاردا و هانسی یؤنتملر ایله قارشیلیق وئره بیلر؟» و «سیز اؤز حیاتینیزدا چوخ بویوتلو باسقی سیستئمینی نئجه تجروبه ائدیب‌سینیز و اونا نئجه تپگی گؤستریب‌سینیز؟» کیمی سواللاری جاوابلاییر.
ایرانداکی قادین آیاقلانمالاری‌نین آذربایجانداکی کاراکتئری حاقیندا دانیشارکن تورکان بوزکورت دئییر کی، حرکتین باشلاریندا سسلندیریلن «زن، زندگی، آزادی» شوعاری زامانلا فرقلی بؤلگه‌لره اویغولاشدیریلاراق او بؤلگه‌نین کولتورو و پروبلئملرینی عکس ائتدیرن شوعارلارا چئوریلمه‌یه باشلاندی و آذربایجاندا دا «آذربایجان قیزلاری، آزادلیق اولدوزلاری»، »قادین، یاشام، آزادلیق» و «آزادلیق، عدالت، میللی حکومت» کیمی شوعارلار سسلندیریلمه‌یه باشلاندی.
«اصلینده بو، آذربایجان قادینلارینین ایشتیراک ائتدیگی بیرینجی آیاقلانما دئییل. آذربایجان قادینلاری داها اؤنجه‌کی بوتون آیاقلانمالارین دا بیر پارچاسی اولموشدور. بونو حبس اولونانلاردان، اؤلنلردن ده گؤره بیلریک. آنجاق سای اولاراق داها آز اولدوقلاریندان سسلری بو قدر چیخمیردی. اونلار توپلوما دوزگون تقدیم ائدیلمیردیلر. بونا گؤره ده موباریزه‌لری بعضی گوجلر طرفیندن خالچانین آلتینا سوپورولوپ یاددان چیخاریلیردی. آما بو اوردا اولمادیقلاری و یا بو آیاقلانمالارین بیر پارچاسی اولمادیقلاری آنلامینا گلمیر.»
تورکان بوزکورت قئید ائدیر کی، آذربایجان بؤلگه‌سینده بؤیومه‌دیگی اوچون اونون قارشیلاشدیغی باسقیلار و پروبلئملر بو بؤلگه‌ده یاشایانلارا گؤره داها آز اولوب. او، آذربایجاندا ۱۲-۱۳ یاشلاریندا ائولندیریلن، اوخویوب بیتیرسه بئله تهلوکه‌‌‌سیزلیک، گئییم طرزی و باشقا مسئله‌‌لره گؤره ایش تاپا بیلمه‌ین قادینلارین وارلیغی‌نین بؤیوک پروبلئملردن بیری اولدوغونو قئید ائدیر.
«حجاب پروبلئمی ایرانداکی بوتون قادینلاری باسقی آلتیندا قویسا دا، تهراندا و تبریزده‌کی حجاب پروبلئمی عینی پروبلئم دئییل. سنین پلیس طرفیندن، قانون طرفیندن، گشت ارشاد طرفیندن معروض قالدیغین شئی‌لر اصلینده ائتنیک اولاراق هارالی اولدوغون، صینیف اولاراق، فینانسال اولاراق توپلومداکی یئرین، سنین بو سیستمین ایچیندن چیخیب چیخا بیلمه‌دیگینله باغلیدیر. اگر تهراندا یاشایان بیر قادی‌نین حجابی دوزگون دئییلسه او پول وئره‌رک جزادان قاچینا بیلر. آما بو، تبریزده و یا بلوچستاندا، اورمیه‌ده عینی درجه‌‌‌ده دئییل. سنین پروبلئمین تهراندا حجابیندیرسا، آذربایجاندا قادینلارین تحصیل مسئله‌‌سی، آزیاشلی قیزلارین ائولنمه‌سی ایله باغلی پروبلملری وار. اونا گؤره ده حجاب، اصلینده، داها اوست سويیه‌‌ده اولان و دومینانت کولتوردن گلن قادینلارین پروبلئملری اولور.»
تورکان بوزکورتون سؤزلرینه گؤره، آذربایجان قادینلاری اؤز آرالاریندا معین تشکیلاتلانمالار شکلینده مؤوجوددورلار، لاکین بونلار سیاسی تشکیلاتلانمالار اولمادیغی اوچون سسلری خاریجه چیخا بیلمیر، بونا گؤره ده آذربایجان قادینلارینا پاسیولیک دامغاسی وورولور.
«بوتون آذربایجان قیزلارینا ائدیلدیگی کیمی کیچیک یاشلاردان منیمله ائولیلیک، ار باره‌ده دانیشیبلار کی، سن بو زامان ائولنمه‌لیسن، بو قدر اوشاغین اولمالیدیر. آما عینی درجه‌‌‌ده منه دئییلمه‌ییب کی، سن مدرسه‌یه گئتمه‌لیسن، اوخومالیسان، ایشین اولمالیدیر. دونیایا گلندن منه دئییردیلر کی، سن منیم گلینیم اولاجاقسان. منی اینسان کیمی یوخ، ساده‌جه آنا اولاراق گؤرور و ساده‌جه دوشونورلر کی، اونلارین اوغوللارینا یاخشی خیدمت ائدن آرواد اولاجاغام یا یوخ. بونو فیزیکی و سؤزلو شدته قدر آپارا بیلریک. مثلا، بیر چوخو منه «تورکان قیزیم» دئییر. یوخ، من سنین قیزین دئییلم، اگر منی حقیقتاً سئویرسنسه سن منه ده‌يرینی بئله گؤسترمه‌مه‌لیسن. منیم آغزیمدان چیخان سؤاللاری و یا ایدئولوژیلری او یئره ائندیریرلر کی، من فیلانکه‌سین قیزی اولدوغوم اوچون و یا فیلانکسله برابر اولدوغوم اوچون اونلار وار. دئمیرلر کی، فیلانکس بو قدر اوخویوب و دیپلم آلیب. «خوصوصیله ائولیلیک مسئله‌‌سی دوشونولنده عادتاً قادینلار ساتیلیر. «قیزینی وئر» و یا «قیز آل» دئییریک. بو، قادینلاری اوبیئکتیو‌لشدیریر و حیاتلاری ایله باغلی آکتیو قرارلار وئرمه‌لی اولان اینسانلارا دئییل، اونلاری وئریله و یا آلینا بیلن شئیلره چئویریر.»
بو آیاقلانمالاردا قادینا باخیش مؤوضوسوندا دانیشارکن تورکان بوزکورت دئییر کی، ساده‌جه قادین اولدوقلاری اوچون حاقلارینی مودافیه ائتمه جهدلری دویغوساللیغا باغلانیر، مسئله‌نین تمه‌لینه گئدیب بو سؤزلرین نییه، هانسی باخیش آچیسیندان گلدیگینی اؤنمسمیرلر.
«قادینلارین آرخاسیندان بیر شئی دئییلدیگی زامان بو همیشه چوخ شخصی اولور. مثلا، بیر نفر منیم دئدیگیم بیر شئیه قارشیدیرسا من فیلان مسئله‌‌ده بو فیکره قارشییام دئمیر. اونون یئرینه بو قادین فیلان ایشی گؤرور، پیس سؤیوشلر سؤیور و س. دئیه‌رک، اصلینده، فیکره دئییل، اونو دئین قادینا قارشی دورور. بو پروبلئملرین هامیسی آذربایجان توپلومونون ایچینده ده اولور و تئزلیکله بیتن بیر شئی ده دئییل. چونکی بیز اورادان چیخساق دا، بیزیم اوچون یارادیلان کولتور، منطیق و باسقینی دا اؤزوموزله گتیرمیشیک و بو هله ده داوام ائدیر.»
تورکان قئید ائدیر کی، کانادادا بؤیودویو و بیر چوخ کولتورلری اؤزونده بیر‌لشدیردیگی اوچون اونون تورکلویو همیشه سؤال آلتیندادیر. او دئییر کی «دوشونورم کی، بو جینسيّته خاص بیر پروبلئمدیر. بیزیم کولتوروموزده قادینلار پاسیو گؤروندویو اوچون، ائتدیکلری شئی‌لرین چوخو تأثیر کیمی گؤرونور، ایداره اولونان و دوشونولموش قرار کیمی دئییل. باخمایاراق کی، من آنا دیلیمی دوزگون شکیلده اؤیرنمک و کولتورومو تطبیق ائتمک اوچون باشقالاریندان داها چوخ واخت آییریب و چالیشیرام، منیم ایدئولوگییالاریم همیشه غربلشمیش کیمی دامغالانیب». او، دئییر کی، اونون آرقومئنتلری‌نین و قرارلاری‌نین منطیقینه چوخ محل قویولمور و بونون عوضینه آذربایجان قیزی‌نین نئجه اولماسی گرکدییی و عادت-عنعنه‌‌لری یئر آلیر. میسوگینیست و ایرقچی بیر حکومت آلتیندا یاشایان بیر خالق اولاراق بونون اؤزو درین بیر پروبلئملیدیر.
«مونولوق» آذربایجان سیویک نئیشن ایله اتک‌یازی‌نین اورتاق پروژه‌سی‌دیر. اونون مقصدی آذربایجان فعاللاری، دوشونورلری و چالیشانلاری آراسیندا سؤیلمسل دیالوق قورماق و فیکیر آلیش-وئریشی ایمکانی یاراتماقدیر.
بو پروژه چوخ آشامالی بیر چالیشمادیر. ایزله‌یه‌جه‌گینیز بو ویدئو مصاحیبه‌لری سئریسی اونون ایلک آشاماسیدیر. پروژه‌نی اتک یازی مئدیاسیندان و AZ Civic Nation یوتیوب کانالیندان ایزله‌یه بیلرسیز.
ماراقلانانلار و آرتیق بیلگی ایسته‌ینلر آشاغیداکی ایمئیل واسیطه‌سیله بیزیمله علاقه ساخلایا بیلرلر:
