«مونولوق»ون اون دؤردونجو موصاحیبه‌سینده ، شاعر و قادین حاقلاری آکتیویستی تورکان اورمولو ، «سپتامبر آیی‌نین ۲۰-سیندن باشلایان آیاقلانمالارا قادینلار و گنج قیزلار اؤنجولوک ائتدی. بو پروتئستولارین آذربایجانا یانسیماسی و آذربایجانداکی اؤزللیکلری حاققیندا نه دوشونورسونوز؟»، « آذربایجاندا تورک قادینلارینین دورومونو نئجه دیرلندیریرسینیز؟ سیزجه تورک قادینلاری هانسی باسقی سیستئملرینه معروض قالیبلار؟ سیزجه تورک قادینلاری بو باسقیلارا نئجه، هاردا و هانسی یؤنتملر ایله قارشیلیق وئره بیلر؟» و «سیز اؤز حیاتینیزدا چوخ بویوتلو باسقی سیستئمینی نئجه تجروبه ائدیب‌سینیز و اونا نئجه تپگی گؤستریب‌سینیز؟» کیمی سواللاری جاوابلاییر.
ایراندا سون زامانلاردا باش وئرن قادین آیاقلانمالاریندا آذربایجانلی قادینلارین رولوندان دانیشارکن تورکان اورمولو قید ائدیر کی، ایرانین دیگر بؤلگه‌لرینده اولدوغو کیمی آذربایجان بؤلگه‌لرینده ده قادینلار آکتیو فعالییت گؤسترمیش، حدیث نجفی کیمی قادینلاریمیز جانلاریندان اولموشلار.
«منجه، بو حرکتده آذربایجان قادینلارینین دوروشونو بوندان داها اؤنجه اولوب بیتمیش حرکتلردن فرقلندیرن جهت بو دفعه اونلارین اؤز سسلری و اؤز شوعارلاری ایله بو اعتراضلاردا ایشتیراک ائتمه‌لریدیر. آذربایجانلی قادینلار ایرانین ایچینده ده، چؤلونده ده، دونیانین بوتون اؤلکه‌لرینده، سوسیال مدیادا »زن، زندگی، آزادی» شوعارینی »قادین، یاشام، اؤزگورلوک» کیمی چئویره‌رک اؤز سسلری، اؤز شوعارلاری ایله اعتراضلارا قاتیلیرلار. بونون دا ندنی، البته کی، بیزیم قادینلاریمیزین آرتیق جینسيّتلری ایله ایلگیلی سورونلاری‌نین یانیندا ائتنیک کیملیکلری ایله باغلی سورونلاری‌نین دا فرقینده اولماسیدیر و اونلار اعتراضلاریندا دا بونو آچیقجا بیلدیریرلر. من امینم، گئدیشات و بوتون فاکتلار دا بونو گؤستریر کی، آذربایجان قادینی آرتیق نه ایسته‌دیگی‌نین فرقینده‌دیر. »
ایراندا تورک قادینلارینین دوروموندان بحث ائدن تورکان اورمولو دئییر کی، جینسيّتلری ایله باغلی باسقیلارلا یاناشی ائتنیک کیملیکلری ایله علاقه دار باسقیلارا دا معروض قالدیغیندان، ایراندا تورک قادینلارینین دورومو فارس قادینلارا نیسبتاً داها پیسدیر. عینی زاماندا مدنی، توپلومسال، مادی ایمکانلاری دا داها پیسدیر، قاپیلار تورک قادینلارینین اوزونه فارسلارا نیسبتاً داها قاپالیدیر.
«من یارادیجیلیغا اوشاقکن باشلادیم، ۸ یاشیندا ایلک شعریمی یازدیم آنجاق فارس دیلینده ایدی. یازدیغیم شعرلر چوخ جدّی شعرلر اولماسا بئله او یاشدا بؤیوک دستک گؤرردی، آلقیشلایان چوخ اولاردی. ۱۳-۱۴ یاشیندان سونرا من اؤز آنا دیلیمده یازماغا باشلادیم، فارسجادان تورکجه‌یه کئچید دؤنمی منیم اوچون چوخ چتین بیر دؤنم اولدو. بیلیردیم کی، آرتیق آنا دیلیمده یازمالییام، آنا دیلیمده اوخومالییام. آنجاق موقایسه اولونمایاجاق قدر چتین بیر دوروم ایدی. قایناقلار آز ایدی، منی اوخویان، آلقیشلایان یوخ ایدی. تصوّور ائدین کی، من آنا دیلیمده یازیرام آما منیم آنام منیم نه یازدیغیمی اوخویا بیلمیر، باشا دوشمور. بیر طرفدن بیز بو دیلی چتینلیکله اؤزوموز اؤیره‌نیردیک. من ۲۰-۲۲ ایل اؤنجه‌دن دانیشیرام، ایندی فرقلیدیر، ایمکانلار چوخدور. بو گونه قدر ده بیز گؤروروک کی، آنا دیلینده یازیب فعالییت گؤسترن گونئی آذربایجانلی یازارلار، شاعرلریمیزین هامیسی باسقیلارلا قارشیلاشیرلار؛ ارشاد مميزیسی، مجوز آلما چتینلیکلری، کیتابلارین چوخ آز سایدا نشر اولونماسی، نشر اولونان کیتابلارین ساتیشینداکی زورلوقلار و س. بونو من اؤزوم ده بیر یارادیجی کیمی بو گونه قدر تجروبه ائتمیشم. مدرسه‌ده اؤیرنجی ایدیم، آنا دیلیمده یازیردیم و دفعه‌‌لرله مدره‌سه‌نین رسمیلریندن، معلم‌لردن ایسته‌دیم کی من اوخویوم، منیم شعریمی بیر یئرده چاپ ائدین. بونا کسین بیر یوخ جاوابی وئریلدی کی، محض فارسجا یازمالیسان. »
«مونولوق» آذربایجان سیویک نئیشن ایله اتک‌یازی‌نین اورتاق پروژه‌سی‌دیر. اونون مقصدی آذربایجان فعاللاری، دوشونورلری و چالیشانلاری آراسیندا سؤیلمسل دیالوق قورماق و فیکیر آلیش-وئریشی ایمکانی یاراتماقدیر.
بو پروژه چوخ آشامالی بیر چالیشمادیر. ایزله‌یه‌جه‌گینیز بو ویدئو مصاحیبه‌لری سئریسی اونون ایلک آشاماسیدیر. پروژه‌نی اتک یازی مئدیاسیندان و AZ Civic Nation یوتیوب کانالیندان ایزله‌یه بیلرسیز.
ماراقلانانلار و آرتیق بیلگی ایسته‌ینلر آشاغیداکی ایمئیل واسیطه‌سیله بیزیمله علاقه ساخلایا بیلرلر:
