ملیک‌کندی(ملکان) شهرینین ایسلامی تبلیغات ایداره‌سینین مودیری علی قربان‌زاده بیر کامپیوتر خیدمت‌لری گؤسته‌رن شیرکته 25 مهرده یازدیغی مکتوبدا وفات اعلان‌لاریندا قادین آدلارینین یازیلماسینین قانون پوزونتوسو ساییلاجاغینی قید ائدیب.
ایکی ایل اؤنجه ایسه گیلان ویلایتینین جمعه ایمامی قادین شکلینین قبیرداشی اوستونه وورولماسینین دینی حؤکم‌لره ضد اولدوغونو دئمیشدی. او قبیر داشینا قادین سیماسینین حک ائدیلمه‌سینین قرآن آیه‌لرینه ایستیناد گؤستره‌رک اخلاقسیزلیق اولدوغونو قید ائدیب.
همین واخت آفتاب یزد قزئتینده قبیریستانلیق‌لاردا قادین سیماسینین حک ائدیلدیگی قبیرداش‌لارینین گؤتورولمه‌سینین واجیبلیگی وورغولاناراق بئله قبیر داش‌لاریندان تصویرلر گؤتورولمه‌سه قبیر داش‌لاری داغیدیلاجاق دئیه قید ائدیلیب.
گئنیش رئاکسییالارا سبب اولان ملیک‌کندی ایسلامی تبلیغات ایداره‌سینین مودیری‌نین مکتوبونا شرقی آذربایجان ویلایتینین ایسلامی تبلیغات ایداره‌سینین مودیری ده موناسیبت بیلدیرمه‌لی اولوب. او دئییب کی بئله بیر قاداغا مؤوجود دئییل و وفات اعلان‌لاریندا قادین آدلارینی یازانلارا هئچ بیر جزا وئریله بیلمز.
