گونئی آذربایجانلی‌لار طرفیندن ۱۴۰۱-جی ایلین مرداد آییندا تورکیه‌ده قورولان قوبوستان نشریاتی مختلف دیللرده، خصوصی ایله تورکیه تورکجه‌سی، آذربایجان تورکجه‌سی (عرب و لاتین الفبالاردا)، انگلیسجه و فارس دیلینده کتاب و باشقا ماتئریاللار نشر ائتدیریرلر. گونئی آذربایجانلی‌لارین خاریجده ایلک نشریاتی اولاراق قورولان قوبوستان نشریاتی‌نین اینترنت سایتیندا هدفلری‌نین تورکیه، آذربایجان و ایرانلی تورک یازیچی و صنعتچیلرین اثرلرینی نشر ائتدیرمک اولدوغو یازیلیب. اساساً گونئی و قوزئی اولماقلا آذربایجان تاریخی، ادبياتی، مدنيتی و اینجه‌صنعتی ایله باغلی کتاب و ژورنال نشرینی اساس هدفلری کیمی یازیبلار.
قوبوستان نشریاتی‌نین قوروجوسو اورال حاتمی بیلدیریب کی گونئی آذربایجان و ایران‌دا حؤکومت طرفیندن تطبیق ائدیلن سانسور و ممیزی‌یه گؤره اورادا نشر ائدیله بیلمه‌ین آذربایجان تورکجه‌سینده اثرلری چاپ ائتدیرمک ده اونلارین اساس هدفلریندندیر.
قوبوستان نشریاتی چرچیوه‌سینده نشر اولونان قوبوستان ژورنالیندا کولتور و اینجه‌صنعت ایله باغلی مسئله‌‌لره دقت یئتیریلیب. بو ژورنال مختلف اؤلکلرده، خصوصی ایله ده تورکیه، آذربایجان و ایران‌دا (گونئی آذربایجان باشدا اولماقلا) یاشایان صنعتکارلاری، مدنيّت خادیملرینی بیر آرایا گتیره‌رک اوخوجولارلا تانیش ائدیر.
قوبوستان ژورنالی‌نین آدیندان دا بللی اولدوغو کیمی آذربایجان اینجه‌صنعت تاریخی، مدنيّتی و کولتور میراثی ایله ماراقلانیر و بو باره‌ده بعضی لاییحه‌‌لر حیاتا کئچیره‌جه‌یینی بیلدیریر. قوبوستان نشریاتی بوتون بو خیدمتلری تقدیم ائدرکن کربن دی اکسید چیرکلنمه‌سینی مینیموما ائندیرمک اوچون دیجیتال و یا الکترون نشریاتی دستکله‌ییر. هابئله ساتیشین آسانلیغی اوچون، نشرلرینی بوتون دونیا اوخوجولارینا چاتدیرماق اوچون الکترون کتاب و الکترون ژورنال فورماتینا دا اوستونلوک وئریر.
قوبوستان نشریاتی‌نین و ژورنالی‌نین قوروجوسو اورال حاتمی دئییب کی قوبوستان نشریاتی اولاراق کتاب نشری، ساتیشی و یاییلماسی ایله بیرلیکده تورکیه تورکجه‌سی، آذربایجان تورکجه‌سی و فارسجا رئداکتورلوق و رئداکسییا خیدمتلری، کتاب، ژورنال صحیفه و اوز قابیغی دیزاینی، تورکیه، آذربایجان و آوروپا اؤلکه‌لرینده ISBN ، بارکود و باندرول موراجعتلری ائتمک، چاپ خیدمتلری، پایلانما و ساتیش ایشلری، الکترون کتاب حاضرلاماق، کتاب و اثر تانیتماق ایشلری، مولف و یازیچیلارا اینترنت سایتی حاضیرلاماق، کتاب تانیتما ویدیوسو حاضیرلاماق، سسلی (audio) کتابلارین حاضرلانماسی ایشلرینی گؤرورلر.
سون اولاراق قوبوستان ژورنالی‌نین بیرینجی ساییندا اورال حاتمی، سعید بیدوخت، رضا طالبی، مروه حاتمی، توران مورادووا، ائنصار بایبورت، نورجیهان ولی اوغلو، اؤزلم دمیر، نسیم صادق، امیر زارعی، اویا جانسو دمیرکالئ، راحب م. قنبرلو، جمال چولاک، شیدا سؤزئن، ارسطو مجرد و اومار کمال طرفیندن یازیلان مقاله‌لر یئر آلیب.
قوبوستان ژورنالی‌نین ایکینجی سایی ۲۰۲۳-جو ایلین یانوار آییندا( ۱۴۰۱-جی ایلین دی آیی) یایینلاناجاق. بو سایی اوچون ۱۵ دئکابر ۲۰۲۲-جی ایل (۲۴/ آذر/ ۱۴۰۱) تاریخینه قدر مقاله قبول ائدیله‌جک.
ماراقلانانلار و آرتیق بیلگی ایسته‌ینلر آشاغیداکی آدرسلردن علاقه ساخلایا بیلرلر:
