تبریز بیلیم‌یوردونون آذربایجان تورکجه‌سی و ادبياتی فاکولته‌سینده اوخویان اؤیرنجی‌لر، بیلیم‌یوردونون رئیس‌ینین بو فاکولته حاقیندا وئردیگی قرارلارا و بعضی تشکیلاتلارین تضییقلرینه گؤره ائله‌جه ده فارس ادبياتی بؤلومونون عضولری‌نین موداخیله‌سی اوجباتیندان یوکسک تحصیللی تورک دیلی اؤیرتمنلری‌نین ایشه قبول ائدیلمه‌مه‌سینه اعتراض ائتمک اوچون سوسیال شبکه‌لرده بیر بیانات یاییبلار. بو بیاناتا اساسا، اؤیرنجی‌لر درسلره قاتیلماماق نيتینده‌دیرلر و بو اعتراضلار نؤوبتی ترم‌ده نتیجه‌لر آلینانا قدر داوام ائده‌جک.
یاییلان خبرلره اساسا، بیر نئچه ایلدیر کی، آکادئمیک کادرلارین ایشه گؤتورولمه‌سی جهدلرینه باخمایاراق، چوخ‌سایلی تضییقلر بو ساحه‌‌‌ده‌کی آکادئمیک کادرلارین تبریز بیلیم‌یوردونا جلب ائدیلمه‌سینی امکانسیز ائدیب. بیاناتداکی ادعالارا گؤره، آذربایجان تورکجه‌سی و ادبياتی فاکولته‌سینه یئنی آکادئمیک کادرلارین جلب اولونماسی ایله باغلی آلینان یئنی قرارلار و فارس ادبياتی بؤلومونون عضولری‌نین موداخیله‌سی، اؤنوموزده‌کی ۱۰ ایل بویونجا بو فاکولته‌یه یئنی آکادئمیک کادرلارین تعیین ائدیلمه‌سی‌نین مومکون اولمایاجاغینی گؤستریر.
کئچمیش ایللرده ده آذربایجان تورکجه‌سی و ادبياتی فاکولته‌سینده درسلیک‌لرده ديیشیکلیک‌لر ائدیلمه‌سی ایله باغلی جدی پروبلئملر اورتایا چیخیب. بو ديیشیکلیک‌لر آذربایجان تورکجه‌سی و ادبياتی ایله هئچ بیر علاقه‌‌‌سی اولمایان درسلرین پروقرامدا یئر توتماسینا سبب اولوب. بوندان علاوه بو فاکولته‌نین اؤیرنجی‌لرینه بعضی تشکیلاتلار طرفیندن تضییقلر ده اولور.
