شرقی آذربایجانین مدنیت و ایرشاد ایداره‌سی خردادین ۲۹-دا تبریزده نظامی گنجوی-یه حصر اولونموش کنگره کئچیره‌جک. بو کنگره‌ده ایفاچیلیق صنعتی(هنرهای نمایشی) اوزره متخصص قطب‌الدین صادقی‌نین ایشتیراکی موباحیثه‌لره سبب اولدو. بیر قروپ آذربایجانلی مدنیت خادیمی نظامییه حصر ائدیلمیش کنگره‌ده قطب‌الدین صادقی‌نین ایشتیراکینی قبول‌ائدیلمز حساب ائدیرلر.
ایرانین کوردوستان ویلایتیندن اولان قطب‌الدین صادقی‌نین پئشه‌کار فعالیت‌لرینده نیظامی حاقیندا هر هانسی اؤنملی تدقیقاتی‌نین اولمادیغی بیلینیر. لاکین او نیظامینی ایرانلی کیمی تانیدیر و اونون آناسی‌نین کورد اولدوغونو ایدعا ائدیر. قطب‌الدین صادقی همچینین ۴۴ گونلوک وطن موحاربه‌سینده ده آذربایجان اوردوسونا و حاکمیت رهبرلرینه قارشی چیخیش ائتمیشدی. بو ایسه گونئیلی‌لرین اعتراض‌لارینا سبب اولموشدو.
داها سونرا او اعتراض‌لاری اساس‌سیز حساب ائده‌‌رک شرقی و غربی آذربایجان ویلایت‌لرینین آذربایجان رئسپوبلیکاسی ایله علاقه‌دار اولمادیغینی دئمیشدی. فارس دیلی و ادبیاتی آکادئمییاسی‌نین(فرهنگستان زبان و ادبیات فارسی) عضوو اولان قطب‌الدین صادقی‌نین ایرانین خاریجینده‌کی کوردلرله سیخ علاقه‌سینین اولدوغو بیلینیر لاکین گونئی آذربایجانلا قوزئی‌ین علاقه‌سینی یئرسیز حساب ائدیر. مثال اوچون او عراق-ین سلیمانیه شهرینده‌کی فعالیتینه گؤره تقدیر ائدیلیب. تورکیه‌نین سیورک رایونوندان اولان موغنی شیوان پرورله دوستلوق موناسیبت‌لری اولدوغو بیلینیر. قئید ائتمک لازیمدیر کی شیوان پرور گونئی آذربایجانین اورمو کیمی بیر چوخ شهرلرینین اصلینده “کوردوستان”-ا عایید اولدوغونو ایدعا ائد‌ن شخصدیر.
قطب‌الدین صادقی هم ده تورکیه جومهوریتینه قارشی دا چیخیش‌لار ائدیب. مثال اوچون او عراق شام ایسلام دؤولتینی(داعشی) تورکیه‌نین بؤلگه‌یه ایستیلاسی یولوندا ایستیفاده ائتدیگی قوه کیمی تانیدیب. قئید ائتمک واجیبدیر کی آذربایجان و تورکیه جومهوریت‌لرینه قارشی آچیقجا دوشمن باخیش‌لاری اولان قطب‌الدین صادقی‌نین آذربایجانلی شاعیر نظامییه حصر ائدیلمیش کنگره‌ده ایشتیراکی شرقی آذربایجان ویلایتی‌نین مدنیت و ایرشاد ایداره‌سی‌‌نین طلبی ایله گئرچکله‌شه‌جکدی. آنجاق بو دعوت اعتراضلارا سبب اولدو.
آذر انجمن‌ین وئردیگی خبره اساسا مدنی فعاللارین گئنیش اعتراضی نتیجه‌سینده قطب‌الدین صادقی‌نین کنگره‌یه دعوتی لغو اولونموشدور.
