«اتک‌یازی سایتی» آذربایجان تورکجه‌سینده کیتاب‌لار حاضیرلاماغا باشلاییب. پروفئسور نصیب نصیبلی‌نین «آذربایجان تاریخی» آدلی کیتابی‌نین الکترون وئرسییاسی بو لاییحه‌نین بیرینجیسی اولوب. بو کیتاب ۲۰۱۹-جو ایلده آنکارادا تورکیه تورکجه‌سینده و داها سونرا آذربایجان تورکجه‌سینده باکیدا نشر ائدیلیب. کیتاب آیدین موغانلی طرفیندن عرب الفباسینا کؤچورولموشدور.
«آذربایجان تاریخی؛ میللت، دؤولت، سیاست» کیتابی تاریخچی نصیب نصیبلی‌نین قوزئی و گونئی آذربایجانین تاریخینی پارالئل شکیلده آراشدیران کیتابیدیر. او «آمئریکانین سسی» ایله موصاحیبه‌سینده گونئیله قوزئی آدی‌نین بیر یئرده گئتمه‌سینی اؤنملی حساب ائتدیگینی دئییب و آذربایجانین تورکیه‌ده داها یاخشی تانینماسی اوچون بو کیتابی تورکیه تورکجه‌سینده یازدیغینی بیلدیریب.
نصیب نصیبلی بو اثرده میللت و میللتچیلیگین تاریخچیلیک علمینده نه اولدوغونو و میللت‌لری یارادان عامیل‌لرین نئجه اورتایا گلدیگی باره‌ده ایظاحات وئریب. او داها سونرا ایلکین تورک دؤولت‌لریندن باشلایاراق آذربایجان تاریخینه کئچیر.
۱۹-جو یوزایللکده آذربایجان ایکییه بؤلونور و بونونلا دا قوزئی و گونئی فرقلی سیستئم‌لرده اینکیشاف ائدیرلر. نصیب نصیبلی دونیانی چالخالایان میللی دؤولت‌لرین یارانماسی دؤورونده آذربایجانین هر ایکی طرفینین هانسی سبب‌لره گؤره بو پروسئسدن دالا قالدیقلاری باره‌ده اؤنملی معلومات‌لار وئریب. داها سونرا ایسه چاغداش تاریخده هر ایکی طرفده گئدن آزادلیق حرکات‌لارینی آراشدیراراق بو حرکات‌لارین قارشیسیندا اولان عامیل‌لری شرح ائدیر.
ان سوندا ایسه قوزئیده یارانان موستقیل آذربایجان رئسپوبلیکاسی و گونئی آذربایجان میللی حرکاتی‌نین یول خریطه‌سینی آچیقلایاراق، تأثیرلی اولان موثبت و منفی عامیل‌لری تدقیق ائدیب.
مؤلفی پرفئسور نصیب نصیبلی اولان و «اتک‌یازی» سایتی‌نین حاضیرلادیغی بیرینجی کیتاب اولان «آذربایجان تاریخی» آدلی بو کیتابی “etekyazi.com” سایتیندان و یا اونون تلگرام کانالیندان الده ائده بیلرسینیز.
