موغاندا کئچیریله‌جک اولان موغام کونسئرتی‌نین مجویزی کونسئرتدن بیر گون قاباق لغو ائدیلیب. موغانین پارساباد شهری‌نین تامین شوراسی بیلئت‌لری ساتیلمیش کونسئرتین گئرچکلشمه‌سینه قاداغا قویوب. ایفا ائد‌ه‌جک اولان قروپون باشچیسی اشکان احمدی اؤز سوسیال مئدیا حسابیندان بو خبری بیلدیریب.
بوتا موسیقی قروپو ۲۷ اردیبهشت تاریخینده گرچکلشدیره‌جه‌یی بو کونسئرتین ۵۰۰-ه یاخین بیلئتینی ساتیب و بوتون حاضرلیق‌لارینی بیتیریب. لاکین بیر گون قاباق کونسئرتین مجویزی لغو ائدیلیب. مجویزی لغو ائد‌ن قوروم سیپاه، پارساباد فرمانداری و ایسلامی ایرشاد و مدنیت ناظیرلیگی‌نین پارسابادداکی نظارتچی‌سیندن تشکیل اولونوب.
مجویزین لغو اولونما سببی‌نین اینسان قالابالیغی و هرج و مرج اولدوغونو دئین تامین شوراسی بوندان قاباق ماکان بند کیمی فارس موسیقی قوروپ‌لارینا مجویز وئریب. قئید ائتمک لازیم‌دیر کی همین کونسئرتده ۵ میندن چوخ شخص ایشتیراک ائدیب. بیر باشا نومونه ایسه مین‌لرله شخصین ایشتیراکی ایله کئچن افشین آذری آدلی بیر خواننده‌نین موغانداکی کونسئرتی‌دیر.
پارساباد شهر فعال‌لاری سوسیال مئدیا اوزَریندن مجویزین لغو ائدیلمه‌سینه اعتراض ائدیرلر. اونلار نئجه اولور کی مین‌لرله اینسانین ایشتیراکی ایله کئچیریلن کونسئرت هرج و مرجه سبب اولمور لاکین ۵۰۰ موغام دینله‌ییجیسی نیظامسیزلیق یارادیر دئییرلر.
