بو مقاله رابرت وایلد طرفیندن ۲۰۱۸-جی ایلین مارت آییندا ThoughtCo سایتیندا درج ائدیلیب و اتک‌یازی ترجومه قروپو اونو آذربایجان تورکجه‌سینه ترجومه ائدیب.
۱۹۴۵-جی ایلده اینگیلتره‌ده هله ده دونیانین هر یئریندن شوک سوال‌لار دوغوران بیر حادیثه باش وئردی: بؤیوک بریتانیانی ایکینجی دونیا موحاریبه‌سینده غلبه‌یه آپاران شخص وینستون چرچیل ان بؤیوک اوغورونو الده ائتدیگی زامان، اوسته‌لیک بو قدر بؤیوک بیر فرقله وظیفه‌دن آیریلدی؟ چوخلارینا ائله گلیر کی، بریتانیا سون درجه نانکور ایدی، لاکین داها درینه ائندیینیزده چرچیلین بوتؤولوکله موحاریبه‌یه دقت یئتیرمه‌سی اؤزونون و اونون سیاسی پارتیسی‌نین، بریتانیا خالقی‌نین روحی وضعیتیندن خبرسیزلشمه‌سینه و اونلارین موحاریبه‌دن اوَلکی اعتبارلارینین جمعیتی باسقی آلتیندا ساخلاماسینا ایجازه وئردیگینی گؤررسینیز.
چرچیل و موحاریبه زامانی فیکیر بیرلیگی
۱۹۴۰-جی ایلده وینستون چرچیل ایکینجی دونیا موحاریبه‌سینده آلمانا قارشی اودوزموش کیمی گؤرونن بریتانیانین باش ناظیری تعیین ائدیلدی. اوزون کاریئراسی اولان، سانکی سونرادان بؤیوک تأثیرله قاییتماق اوچون بیرینجی دونیا موحاریبه‌سینده بیر حکومتده وظیفه‌دن چیخاریلان و هیتلئری اوزون مدتدیر تنقید ائد‌ن بیر شخص، ماراقلی سئچیم ایدی. او، بریتانیانین اوچ اساس پارتیسیندن – ایشچی پارتیسی، لیبئرال و موحافیظه‌کارلاردان تشکیل اولونان بیر کوالیسیون یاراتدی و بوتون دقتینی موحاریبه‌یه یؤنلتدی. او، کوالیسینو اوستالیقلا بیر یئرده ساخلایاراق، اوردونون بیرلیگینی، کاپیتالیست و کومونیست‌لر آراسیندا بئین‌الخالق ایتفاق‌لاری قورویاراق، عینی زاماندا پارتی سیاستینی حیاتا کئچیرمکدن ایمتیناع ائتدی و موحافیظه‌کار پارتیسینی اؤزونون و انگلستانین قازاندیغی اوغورلارلا گوجلندیرمکدن ایمتیناع ائتدی. بیر چوخ معاصر تاماشاچی‌لار اوچون بئله گؤرونه بیلر کی، موحاریبه‌نی ایداره ائتمک یئنیدن سئچیلمه‌یه حاق قازاندیرار، لاکین موحاریبه باشا چاتدیقدا و بریتانیا ۱۹۴۵-جی ایل سئچکی‌لری اوچون یئنیدن پارتی سیاستینه دؤندویونده چرچیل اؤزونو الوئریشسیز بیر وضعیتده گؤردو. او اینسان‌لارین نه ایسته‌دیگینی و یا هئچ اولماسا اونلارا نه تکلیف ائده‌جه‌یینی بیلمیردی.
چرچیل کاریئراسیندا بیر نئچه سیاسی پارتیدن کئچمیش و ائرکن موحاریبه‌ده موحافیظه‌کارلارا رهبرلیک ائده‌‌رک اؤز موحاریبه ایدئیالارینی ایره‌‌لی سورمه‌یه چالیشیب. بو دفعه چوخ داها اوزون بیر وظیفه مدتی اولان بعضی موحافیظه‌کار یولداش‌لاری موحاریبه سونراسی ایشچی پارتیسی و دیگر پارتی‌لر هله ده کامپانییا آپارارکن – ساکیتلشمه، ایشسیزلیک، ایقتیصادی قاریشیقلیق اوچون موحافیظه‌کارلارین علیهینه چالیشارکن – چرچیل اونلار اوچون عینی شئیی ائتمه‌دیگی اوچون، عکسینه بیرلیک و غلبه اوزَرینده دقت یئتیردیینه قایغیلانیردیلار.
چرچیل اصلاحاتی الدن وئردی
موحاریبه زامانی ایشچی پارتیسی‌نین اوغور قازاندیغی بیر ساحه اصلاحات‌لار ایدی. ریفاه اصلاحات‌لاری و دیگر سوسیال تدبیرلر ایکینجی دونیا موحاریبه‌سیندن اوّل اینکیشاف ائتدیریلیردی، لاکین حاکمیتینین ایلک ایل‌لرینده چرچیل انگلستا‌نی بوندان سونرا یئنیدن نئجه قورا بیله‌جه‌یینه دایر بیر حسابات حاظیرلاماغا مجبور ائدیلمیشدی. حساباتا ویلیام بوریدج رهبرلیک ائدیردی و اونون آدینی داشییاجاقدی. چرچیل و باشقالاری حساباتین نتیجه‌لرینی اونلارین نظرده توتدوقلاری یئنیدن‌قورمادان کنارا چیخماسینا و سوسیال و ریفاه اینقیلابیندان باشقا بیر شئی تقدیم ائتمه‌مه‌سینه تعجبلندیلر. موحاریبه‌نین گئدیشاتی دییشیردی و بریتانیانین اومیدلری آرتیردی. بوریج-ین حساباتینین رئاللیغا، یئنی بیر شفقه چئوریلمه‌سینه بؤیوک دستک وار ایدی.
سوسیال مسئله‌لر ایندی بریتانیا سیاسی حیاتینین موحاریبه ایله مشغول اولمایان حیصه‌سینده اوستونلوک تشکیل ائدیردی و چرچیل و موحافیظه‌کارلار ایجتیماعیتین آغلیندا دالی قالمیشدی. بیر زامان‌لار اصلاحاتچی اولان چرچیل کوالیسیون پارچالایا بیله‌جک هر هانسی بیر شئیدن قاچماق ایسته‌ییردی و حساباتی باجاردیغی قدر دستکله‌مه‌دی؛ او، همچینین بوریج و اونون ایدئیالارینی تحقیر ائدیردی. بئله‌لیکله، چرچیل سوسیال اصلاحات مسئله‌سینی سئچکی‌لردن سونرایا ائرته‌له‌دی، ایشچی پارتیسی ایسه بونون داها تئز حیاتا کئچیریلمه‌سی اوچون ال‌لریندن نه گلیردیسه ائتدیلر و سئچکیدن سونرایا دا سؤز وئردیلر. ایشچی پارتیسی امک اصلاحات‌لاری ایله عینیلشدیریلدی و موحافیظه‌کارلار اصلاحاتا قارشی اولماقدا اتهام ائدیلدی. بوندان علاوه، ایشچی پارتیسی کوالیسیون حکومتینه وئردیگی تؤحفه اونلارا حؤرمت قازاندیردی: اوّل‌لر اونلارا شوبهه ائد‌ن اینسان‌لار، ایشجی پارتیسی‌نین اصلاحاتچی حؤکومتی ایداره ائده بیله‌جه‌یینه اینانماغا باشلادیلار.
تاریخ معین ائدیلدی، کامپانییا باشلادی
آوروپادا ایکینجی دونیا موحاریبه‌سی ۱۹۴۵-جی ایل مایین ۸-ده قورتاردی، کوالیسیون مایین ۲۳-ده باشا چاتدی و سئچکی‌لرین ایولون ۵-ده کئچیریله‌جه‌یی بللی اولدو، لاکین عسگرلرین سس‌لرینی توپلاماق اوچون علاوه واخت لازیم اولاجاقدی. ایشچی پارتیسی اصلاحات‌لارا یؤنلمیش گوجلو بیر کامپانییایا باشلادیلار و مئساژلارینی هم بریتانیاداکی‌لارا، هم ده خاریجه مجبوری کؤچکون‌لره چاتدیرماقدا باشی‌سویوقلوق ائتمه‌دیلر. ایل‌لر سونرا عسگرلر ایشچی پارتیسی‌نین مقصدلریندن خبردار اولدوقلارینی، لاکین موحافیظه‌کارلاردان هئچ نه ائشیتمه‌دیکلرینی بیلدیردیلر. بونون عکسینه اولاراق، چرچیلین کامپانییاسی داها چوخ شخصیتی و موحاریبه‌ده الده ائتدیگی نائیلیت‌لر اساسیندا قورولاراق اونون یئنیدن سئچیلمه‌سی یؤنونده ایدی. بیر دفعه او، بریتانیا ایجتیماعیتی‌نین فیکیرلرینی تاماما سهو آنلادی: شرقده هله بیتمه‌لی اولان موحاریبه وار ایدی، اونا گؤره ده چرچیلین دقتی‌نین بو موضوعا یاییندیغی گؤرونوردو.
سئچیجی‌لر موحافیظه‌کارلارین یایماغا چالیشدیقلاری سوسیالیزمله باغلی پارانویایا دئییل، ایشچی پارتیسی‌نین وعدلرینه و گله‌جه‌یین دییشیکلیک‌لرینه داها آچیق ایدیلر؛ اونلار موحاریبه‌ده غالیب گلمیش، لاکین اوندان اوّلکی ایل‌لر پارتیسی باغیشلانمامیش و هئچ واخت – ایندییه قدر – صولحله تامامیله راحت اولدوغو گؤرونمه‌ین بیر اینسانین حرکت‌لرینه آچیق دئییلدیلر. او، ایشچی پارتیسی‌نین ایداره ائتدیگی بریتانیانی نازیست‌لرله موقاییسه ائد‌نده و ایشچی پارتیسی منسوب‌لارینین گئستاپو(نازی‌لر دؤورونده گیزلی پلیس قووه‌سی)-یا احتیاجی اولاجاغینی ادعا ائد‌نده اینسان‌لارا تأثیر ائتمه‌دی و موحافیظه‌کارلارین موحاریبه‌لرآراسی اوغورسوزلوقلاری و حتی لوید جورجون بیرینجی دونیا موحاریبه‌سیندن سونراکی اوغورسوزلوقلاری حاقیندا خاطیره‌لر گوجلو ایدی.
امک غلبه‌سی
نتیجه‌لر ایولون ۲۵-ده گلمه‌یه باشلادی و تئزلیکله ایشچی پارتیسی منسوب‌لارینین ۳۹۳ اوتوراجاق قازاناراق دومینانت چوخلوق الده ائتدیکلری آشکار اولدو. اتلی باش ناظیر ایدی، اونلار ایسته‌دیکلری اصلاحات‌لاری حیاتا کئچیره بیلردیلر و عمومی سس‌وئرمه فاییزلری چوخ یاخین اولسا دا، چرچیل بؤیوک بیر مغلوبیتله مغلوب اولموش کیمی گؤرونوردو. تقریباً اون میلیونا یاخین موحافیظه‌کار سسی‌نین موقابیلینده، ایشچی پارتیسی تخمیناً اون ایکی میلیون سس قازاندی و بونا گؤره ده میللت گؤروندویو قدر دوشونجه طرزینده بیرلیک ایچینده دئییلمیشلر. موحاریبه‌دن یورولموش، بیر گؤزو گله‌جه‌یه باخان بریتانیا، اؤزوندن راضی قالان پارتیانی و اؤز ضررینه و میللتین خئیرینه یؤنلمیش بیر اینسانی رد ائتدی.
بونونلا بئله، چرچیل داها اوّل ده رد ائدیلمیشدی و سون بیر دؤنوشو قالمیشدی. نؤوبتی بیر نئچه ایلی بیر داها اؤزونو کشف ائده‌‌رک کئچیردی و ۱۹۵۱-جی ایلده صلح دؤورونون باش ناظیر کیمی حاکمیتی برپا ائده بیلدی.
