دوکتور آلان لیم‌ین یازدیغی بو مقاله ۲۰۱۹-جو ایلین آوقوست آیی‌نین ۴-ده، ThoughtCo سایتیندا درج ائدیلیب و اتک‌یازی ترجومه قروپو اونو آذربایجان تورکجه‌سینه ترجومه ائدیب.
۱۰% میفی‌نین لغوی
اینسان‌لارین بئیین گوجونون یالنیز ۱۰ فایزینین ایستیفاده ائتدیگینی ائشیتمیش اولا بیلرسینیز. بو ادعایا اساساً بئیین گوجونوزون قالان حیصهسینین قات‌لارینی آچسانیز داها چوخ شئی ائده بیلرسینیز. سیز سوپر داهی اولا بیلرسینیز و یا عقل اوخوما و تلکینسیس کیمی پسیخی(روحی، روانی) گوج‌لر الده ائده بیلرسینیز. بونونلا بئله، ۱۰ فایز میفینی تکذیب ائد‌ن گوجلو دلیل‌لر ده وار. عالیم‌لر ثبوت ائدیبلر کی، اینسان‌لار هر گون بئیین‌لرینین تامامیندان ایستیفاده ائدیرلر.
دلیل‌لره باخمایاراق، ۱۰ فایز میفی مدنی تخیلده بیر چوخ ایستینادلارا ایلهام وئردی. «لیمیت یوخ (نامحدود)» و «لوسی» کیمی فیلم‌لر بئینین اوّل‌لر ال‌چاتماز اولان ۹۰ فایزینی سربست بوراخان درمان‌لار سایه‌سینده ایلاهی گوج‌لری اینکیشاف ائتدیرن قهرمان‌لاری تصویر ائدیر. ۲۰۱۳-جو ایلده آپاریلان بیر آراشدیرما، آمئریکالی‌لارین تخمیناً ۶۵ فایزینین بو سؤزه ایناندیغینی گؤستریب. بوندان باشقا ۱۹۹۸-جی ایلده آپاریلان بیر آراشدیرما دا گؤستردی کی، بئیین فعالیتی ایله باغلی ایشله‌ین پسیخیاترلارین(روانپزشک‌لرین) تام اوچده بیری ده بو فیکیرلری دستکله‌ییرلر.
نوروپسیخولوگییا (روانشناسی عصب شناختی)
نوروپسیخولوگییا بئینین آناتومییاسی‌نین اینسانین داورانیشینا، دویغولارینا و ایدراکینا نئجه تأثیر ائتدیگینی تدقیق ائدیر. ایل‌لر عرضینده بئیین عالیم‌لری بئینین موختلیف حیصه‌لرینین رنگ‌لری تانیماق و یا پروبلئم حل ائتمک کیمی خصوصی فونکسییالارا جاوابده اولدوقلارینی گؤستریبلر. ۱۰ فایز میفین عکسینه، علم آدام‌لاری پوزیترون ائمیسییا توموقرافییاسی(برشنگاری با گسیل پوزیترون) و فونکسیونال ماقنیت رئزونانس گؤرونتوله‌مه (اف‌ام‌آر‌آی: تصویرسازی تشدید مغناطیسی کارکردی) کیمی بئیین گؤرونتوله‌مه اصول‌لاری سایه‌سینده، بئینین هر بیر حیصهسینین گونده‌لیک فعالیتیمیزده آیریلماز پارچا اولدوغونو ثبوت ائتدیلر.
تدقیقات‌لار تامامیله غیرآکتیو اولان بئیین حیصه‌سینی هله تاپماییب. فعالیتی تک نورون‌لار سوییه‌سینده اؤلچن تدقیقات‌لار بئله بئینین هئچ بیر غیرآکتیو ساحه‌سینی آشکار ائتمه‌ییب. بیر اینسانین معین بیر ایشی یئرینه یئتیررکن بئیین فعالیتینی اؤلچن بیر چوخ بئیین گؤرونتوله‌مه تدقیقات‌لاری بئینین موختلیف حیصه‌لرینین نئجه بیرلیکده ایشله‌دیگینی گؤستریر. مثلاً، سیز بو متنی تلفونوزدا اوخویارکن بئینینیزین گؤرمه، اوخویوب آنلاما و تلفونونوزو توتماقدان مسئول اولان بؤلگه‌لر ده داخیل اولماقلا، بعضی حیصه‌لری داها آکتیو اولاجاق.
بونونلا بئله، بعضی بئیین شکیل‌لری ایسته‌مه‌دن ده اولسا ۱۰ فایز میفی دستکله‌ییر، چونکی عمومیتله بوز (رنگده اولان) بئیینده کیچیک پارلاق لکه‌لر گؤستریرلر. بو، یالنیز پارلاق لکه‌لرین فعالیتده اولدوغونو گؤستره بیلر، لاکین بو بئله دئییل. عکسینه رنگلی لکه‌لر، شخصین بیر وظیفه‌نی یئرینه یئتیردیگی زامان (ایش گؤرمه‌دیگی زامانلا موقاییسه‌ده) داها چوخ آکتیو اولدوغونو گؤستریر. بوز لکه‌لر هله ده آکتیودیر، لاکین داها آز درجه‌ده.
۱۰ فایز میفینه بیرباشا ضدیت، ووروش، بئیین تراوماسی و یا کربن‌مونواکسید زهرله‌نمه‌سی نتیجه‌سینده بئیین زده‌سی آلمیش شخص‌لرین بو زده نتیجه‌سینده آرتیق ائده بیلمه‌یه‌جکلری و یا هله ده اوّلجه اولدوغو کیمی یاخشی شکیلده ائده بیلدیگی فعالیت‌لرده یاتیر. یاخشی، اگر ۱۰ فایز میفی دوغرو اولسایدی، بئینین بلکه ده ۹۰ فایزینین زده‌له‌نمه‌سی گونده‌لیک فعالیته تأثیر ائتمزدی.
بونونلا بئله، تدقیقات‌لار گؤستریر کی، بئینین چوخ کیچیک بیر حیصهسینین بئله زده‌له‌نمه‌سی داغیدیجی نتیجه‌لره سبب اولا بیلر. مثلاً، بروکا بؤلگه‌سی‌نین زده‌له‌نمه‌سی سؤزلرین دوزگون فورمالاشماسینا و سلیس نیطقه مانع اولور. باخمایاراق کی عمومی دیل آنلاییشی ساغلام قالیر. چوخ آچیقلانمیش بیر حادیثه‌ده، فلوریدالی بیر قادین “اینسان اولماغین اصل ماهیتی اولان دوشونجه‌لر، قاوراییش‌لار، خاطیره‌لر و دویغولار قابیلیتینی” همیشه‌لیک ایتیردی. بو اکسیژن چاتیشمازلیغی نتیجه‌سینده اوج بئینی‌نین (اوج بئین و یا مخ، بئینین تخمیناً ۸۵ فایزینی تشکیل ائدیر) یاریسی‌نین محو اولماسی ایله گئرچکلشدی.
تکامول آرقومئنت‌لری
۱۰ فایز میفینه قارشی باشقا بیر ثبوت تکامولدن گلیر. یئتکین‌لرین بئینی بدن کوتله‌سینین یالنیز ۲ فایزینی تشکیل ائدیر، لاکین بدن انرژیسی‌نین ۲۰ فایزیندن چوخونو ایستئهلاک ائدیر. موقاییسه اوچون، بیر چوخ اونورغالی نؤع‌لرینین، او جمله‌دن بعضی بالیق‌لارین، سورونن‌لرین، قوش‌لارین و ممه‌لی‌لرین یئتکین بئیین‌لری بدن‌لرینین انرژیسی‌نین ۲-۸ فایزینی ایستئهلاک ائدیر. بئیین، ساغ قالما احتیمالینی آرتیرماق اوچون ال‌وئریشلی خصوصیت‌لری (گله‌جه‌یه) اؤتورن میلیون‌لارلا ایللیک طبیعی سئچمه نتیجه‌سینده فورمالاشیب. اگر بئینین یالنیز ۱۰ فایزی ایستیفاده ائدیلسه، بد‌نین بوتون بئینین ایشله‌مه‌سینی تامین ائتمک اوچون بو قدر انرژی صرف ائده‌جه‌یی احتیمالی آزدیر.
میفین منشایی
۱۰ فایز میفی‌نین اساس جاذیبه‌سی بو فیکیرده‌دیر: بئینینیزین قالان حیصه‌سینی آچا بیلسه‌نیز، داها چوخ شئی ائده بیلجکسینیز. بو میفین عکسینی ثبوت ائد‌ن کیفایت قدر دلیل‌لره باخمایاراق، نییه بیر چوخ اینسان هله ده اینسان‌لارین بئیین‌لرینین یالنیز ۱۰ فایزینی ایستیفاده ائتدیینه اینانیر؟ میفین ایلک دفعه نئجه یاییلدیغی بللی دئییل، لاکین بو فیکیر اونو دستکله‌ین بعضی کیتاب‌لارلا پوپولیارلاشدی. حتی بعضا کؤهنه، قوصورلو نورولوگییا تدقیقات‌لارینا دا اساسلاندی.
بو میف، سیزه داها یاخشی ایشله‌مه‌یین و «پوتئنسیالینیزا» اویغون یاشاماغین یول‌لارینی گؤسترن فردی اینکیشاف کیتاب‌لارینین دستکله‌دیگی مئساژلارلا اویغون اولا بیلر. مثلاً، مشهور « How to Win Friends and Influence People(دوست‌لاری نئجه قازاناق و اینسان‌لارا نئجه تأثیر ائتمک اولار)» کیتابی‌نین اؤنسؤزونده دئییلیر کی اورتالاما بیر اینسانین “اؤزونون گیزلی ذهنی قابیلیتی‌نین یالنیز ۱۰ فایزینی اینکیشاف ائتدیریر”. پسیخولوق ویلیام جیمزه عایید ائدیلن بو ایفاده، بیر اینسانین نه قدر بئیین مادده‌سیندن ایستیفاده ائتمه‌سیندن داها چوخ، اونون داها چوخ شئیه نایل اولماق پوتئنسیالینا ایشاره ائدیر. دیگرلری حتی انیشتینین اؤز داهیلیگینی ۱۰ فایز میفیندن ایستیفاده ائده‌‌رک ایضاح ائتدیگینی سؤیله‌دی، باخمایاراق کی بو ادعالار اساسسیز اولاراق قالیر.
میفین باشقا بیر مومکون منبعی، کؤهنه نورولوگییا تدقیقات‌لاریندان الده ائدیلن “سس‌سیز” بئیین بؤلگه‌لرینده‌دیر. مثلاً ۱۹۳۰-جو ایل‌لرده نوروجرراح (جراح مغز و اعصاب) ویلدر پنفیلد، صرع خسته‌سی اولان خسته‌لرین بئینینه الکترودلار باغلایاراق عملیات کئچیردی. او، بئینین معین حیصه‌لرینین موختلیف حیس‌لر یاشاماغا سبب اولدوغونو، لاکین دیگرلرینین هئچ بیر رئاکسییا وئرمه‌دیگینی گؤردو. بونونلا بئله، تکنولوژی اینکیشاف ائتدیکجه، تدقیقاتچی‌لار پرئفرونتال(پیشانی) لوب‌لاری(بخش‌لری) دا ایحاطه ائد‌ن بو «سس‌سیز» بئیین ساحه‌لرینین اهمیتلی فونکسییالاری اولدوغونو آشکار ائتدیلر.
