اشلی کراسمنین ۲۰۱۸-جی ایل یانوارین ۱۱-ده ToughtCo سایتیندا یازدیغی بو مقاله اتک‌یازی طرفیندن آذربایجان تورکجه‌سینه ترجومه ائدیلیب.
سوسیال فئنومئنولوگییا، سوسیولوگییا ساحه‌سینده اینسان شعورونون سوسیال فعالیت، سوسیال وضعیت‌لر و سوسیال دونیالارین ایستئحصالیندا نئجه بیر رول اوینادیغینی گؤسترمک ایسته‌ین بیر یاناشمادیر. اصلینده، فئنومئنولوگییا جمعیتین اینسان تیکینتیسی اولدوغونا اینامدیر.
فئنومئنولوگییا ایلک اولاراق ۱۹۰۰-جو ایل‌لرین اوَل‌لرینده ادموند هوسرل آدلی آلمان ریاضیاتچی طرفیندن رئاللیغین منبع‌لرینی و یا ماهیت‌لرینی اینسان شعوروندا یئرلشدیرمک اوچون اورتایا قویولوب. یالنیز ۱۹۶۰-جی ایل‌لرده ماکس وبرین یوروملاییجی سوسیولوگییاسی اوچون فلسفی اساس یاراتماغا چالیشان آلفرد شوتز طرفیندن سوسیولوگییا ساحه‌سینه داخیل اولوب. بو ایشی هوسرلین فئنومئنولوژی فلسفه‌سینی سوسیال دونیانین تدقیقینه تطبیق ائتمکله گئرچکلشدیردی. شوتز، گؤرونن اوبیئکتیو سوسیال دونیانین یارانماسینا سبب اولان شئیین سوبیئکتیو معنالار اولدوغونو قبول ائتدی. او، اینسان‌لارین سوسیال قارشیلیقلی علاقه‌نی تعمین ائتمک اوچون دیله و توپلادیقلاری «بیلیک احتیاطی(ذخیره‌سی)»-نا باغلی اولدوقلارینی مودافیعه ائدیردی. بوتون سوسیال قارشیلیقلی علاقه‌لر اوچون فردلرین اؤز دونیالاریندا باشقالارینی خاراکتئریزه ائتمه‌لری لازیمدیر و بیلیک احتیاطی اونلارا بو ایشده کؤمک ائدیر.
سوسیال فئنومئنولوگییادا مرکزی وظیفه اینسان فعالیتی، وضعیت قورولوشو و رئاللیغین قورولوشوندا قارشیلیقلی علاقه‌نی ایضاح ائتمکدیر. بونونلا فئنومئنولوق‌لار جمعیتده باش وئرن فعالیت، وضعیت و رئاللیق آراسینداکی علاقه‌لری آنلاماغا چالیشیرلار. فئنومئنولوگییا هئچ بیر نوقطه نظره سبب کیمی باخمیر، عکسینه بوتون اؤلچولری دیگرلری اوچون اساس حساب ائدیر.
سوسیال فئنومئنولوگییانین تطبیقی
سوسیال فئنومئنولوگییانین کلاسیک تطبیق‌لریندن بیری ۱۹۶۴-جو ایلده پیتر برگر و هانسفرد کلنر طرفیندن ائولیلیک رئاللیغی‌نین سوسیال قورولوشونو ایمتحان ائدرکن گئرچکلشمیشدیر. اونلارین تحلیلینه گؤره، ائولیلیک هر بیری موختلیف دونیالاردان اولان ایکی فردی بیر آرایا گتیریر و اونلاری بیر-بیرینه او قدر یاخینلاشدیریر کی، هر بیرینین حیات عالمی دیگری ایله اونسیته گیریر. بو ایکی فرقلی رئاللیقدان بیر ائولیلیک رئاللیغی یارانیر کی، بو دا داها سونرا همین فردین جمعیتده سوسیال قارشیلیقلی علاقه قورماقدا و فونکسییالار آلماقدا اساس سوسیال کونتئکسته چئوریلیر. ائولیلیک اینسان‌لار اوچون یئنی سوسیال رئاللیق تامین ائدیر و بو دا اساساً حیات یولداشی ایله تک‌به‌تک صحبت‌لر واسیطه‌سیله الده ائدیلیر. اونلارین یئنی سوسیال رئاللیغی ائولیلیکدن کنار باشقا قارشیلیقلی علاقه‌لر نتیجه‌سینده گوجلندیریلیر. زامانلا هر بیر حیات یولداشی‌نین ایچینده فعالیت گؤستره‌جه‌یی یئنی سوسیال عالم‌لرین فورمالاشماسینا کؤمک ائده‌جک یئنی بیر ائولیلیک رئاللیغی اورتایا چیخاجاق.
