حماسی (اونونلا برابر آرخاسیندا نه وارسا) آسقییا آلیرام. ذاتن ده آسقیدا؛ آرتیق اونا شهر پارتیزان آلانیندان بؤیوک بیر آلان قالمامیشدیر.
- اورتادا غزه وار. باتی ساحیل بئله گؤز آردی اولا بیلر. چونکی هدف غزه‌دیر. اسرائیل دولتی هله‌لیک غزه‌نی سئچمیش. اونلار فلسطین آدلی بیر تورپاق تانیمیرلار. سیلیب سیلیب سونوندا فلسطینلی‌لری ایکی شریته سیخیشدیریبلار: باتی ساحیل و غزه زولاغی(شریتی). دولت‌لر ذاتن محافظه‌کار اولار و اسرائیل ایندیلیک غزه‌یه مشغولدور و هله‌لیک باتی ساحیلی آسقییا آلمیش، اما غزه‌نی سیله بیلرلرسه دؤنوب باتی ساحیلی ده سیله‌جکلر.
- اسرائیل_ین بو تورپاق اوغورلاما سیاستینی ده آسقییا آلیرام و هابئله باتی ساحیلی؛ دیره‌ک غزه‌یه گئدیرم. غزه‌ده نه وار؟ یالنیز بیر شئی وار و او دا اؤلوم. اؤلوم ثانیه ثانیه تکرارلانیر. آمارلارا گؤره زامانا نسبت اؤلو ساییسی سون زامانلاردا اولان عراق، سوریه و اوکراین ساواش‌لاریندان چوخدور. البته بیر بؤیوک فرق ده وار: او اوچ ساواشدا اوردولار و میلیتان تشکیلات‌لار ساواشیردیلار و یا ساواشیرلار اما بورادا بیر اوردو وار: اسرائیل اوردوسو و مقابیل طرفده یالنیز سیلاحسیز فلسطین خالقی. بو گونه قدر اوتوز مین حدودوندا اؤلونون چوخونو اوشاق‌لار و قادین‌لار اولوشدورور.
- اسرائیل بوتون غزه‌نی بومباردمان آلتینا آلمیش و مریضخانادان توت بیرلشمیش میللت‌لر تشکیلاتی بینالارینا قدر هئچ بیر یئر امن دئییل. اسرائیل دونیا گؤزو اونونه تام بیر قیرغین سرمیشدیر؛ گنج عسگرلر گوله گوله عمارت‌لری پارتلادیرلار. رفح سرحددینه سیغیشیب و هئچ بیر قاچاق یولو اولمایانلاری بومبالاییرلار و اؤلدورورلر، اؤلدورورلر، اؤلدورورلر و آرتیق «اؤلوم»-دن باشقا بیر ایضاح ائدیجی سؤز قالمامیشدیر.
- اسرائیل دونیانین بیر چوخ یئرینده اؤرت باسدیر ایله ائدیلن اساس بیر سیاستی قیسا بیر زامانا سیغیشدیریب آچیقجا و اوتانمازجا سرگیله‌میشدیر. اسرائیل مئیدان اوخویور. ائله‌بیل بوتون گوجلولر طرفیندن یاشاماق ایسته‌ین اینسان کیمی، اؤزگور یاشاماق ایسته‌ین اینسان‌لارا مئیدان اوخویور. یاشاییشا بئله مئیدان اوخویور: سیزین یاشاییشینیز بیزیم گوجوموزون دوامی‌نین ایستک‌لری و ضرورت‌لری ایله حدودلانیر. یاشاماق و یاشاییش حددینی بیز بللی ائدیریک دئییر؛ زامانیندا زیندالاریمیز و شکنجه‌لریمیزله و زامانیندا سورگون و اؤلدورمه ایله.
- اؤلوم اینسانین سونودور. بئله‌سه بیر سورغو اورتایا آتیلیر: اینسان، بئله‌جه اؤلدورمه و بئله‌جه سونلاندیرماغا سسسیز قالارسا آرتیق نه زامان و نه اوچون سسسینی چیخاراجاقدیر؟
بو سورغونون سیاست و یا اولوس‌لار آراسی حقوق ایله ایلگیسی یوخدور. بو بیر اخلاق سورغوسودور. آکادئمی و اخلاق معللیملگی ایله معاش آلانلاری ایلگیلندیرمه‌سه ده، اما اخلاق مسئله‌لری ایچینده یئرینی ایتیرمز.
