سون زامان‌لار گونئیلی صنعتکار بابک نهرینین ایراندا یاییملانان “جوکر” آدلانان بیر وئریلیشده‌کی چیخیشی موباحیثه‌لره سبب اولوب. “جوکر” بیر رئالیتی شوو پروقرامیدیر و دعوت اولونان قوناق‌لار اساساً تانینمیش شخص‌لر و کومئدییاچی‌لاردیر. موسابیقه فورماتیندا آپاریلان بو پروقرامدا گولن شخص‌لر موسابیقه‌دن کنارلاشدیریلیرلار. ان آز گولن ایسه موسابیقه‌نین غالیبی اولور.
بابک نهرین بو پروقرامدا(جوکر) آشیق گئییمی و سازی ایله چیخیش ائدیب و عئیبه‌جر حرکت‌لرله ایزله‌ییجی‌لری و باشقا قوناق‌لاری گولدورمه‌یه چالیشیب. بو ایسه آذربایجانلی‌لار آراسیندا ناراضیلیق‌لارا سبب اولوب. اونو تنقید ائد‌نلر بابک نهرینین بو چیخیشینین آشیق موسیقی‌سینه حؤرمتسیزلیک اولدوغونو وورغولاییرلار. لاکین فیکیر بیلدیرنلر آراسیندا اونو مودافیعه ائد‌نلر ده وار.
یارانان موباحیثه حاقدا گونئیلی بسته‌کار، ائتنو-موسیقی‌شوناس و نظریه‌چی آریا تورکانبورلو(ترکانبوری) «اتک‌یازی»-یا دانیشیب. آریا تورکانبورلو تنقیدلری یئرلی حساب ائدیر و بابک نهرینی مدافعه ائد‌نلرین فیکیرلرینه جاواب وئریب.
تنقیدلر هر زامان وار و اولمالیدیر
بابک نهرینین آشیق پالتاری و سازی ایله چیخیشینین مودافیعه‌چی‌لری اصلینده بابکین داها اؤنجه ده اوخشار ایش‌لر گؤردویونو لاکین اوندا ناراحاتچیلیق‌لارا سبب اولمادیغینی دئییرلر. اونو مودافیعه ائد‌نلر بونو سبب گؤستره‌رک اونو تنقید ائد‌نلرین اصلینده آشیق مدنیتی‌نین قئیدینه قالمادیقلارینی، اله دوشن فورصتده بابکی ازمک ایسته‌دیکلرینی دئییرلر.
لاکین آریا تورکانبورلو بونونو حقیقت اولمادیغینی دئییر. او بابک نهرینین داها اوّل‌لر ده اوخشار ایش‌لر گؤردویونو قبول ائدیر، لاکین او زامان دا عینی تنقیدلرین اولدوغونو بیلدیریر. او دئییر کی اورتادا وضعیتی داها دا قلوباللاشدیران مسئله سوسیال مئدیادیر. داها اول اولان تنقیدلر صرف صنعتکارلار آراسیندا باش وئریردی، لاکین حاضیرکی وضعیتده بو اعتراض‌لار سوسیال شبکه‌لر واسیطه‌سیله بوتون جمعیته یاییلیر و داها قاباریق شکیلده اؤزونو گؤستریر.
او هم ده داها اوّلکی اعتراض‌لارین تأثیر ائتمه‌دیگینی، بابک نهرینین داها دا ایره‌‌لی گئتدیگینی دئییر. تورکانبورلو “آرشین مال آلان” تاماشاسیندا بابک نهرینین اوزئییر حاجی‌بیلی‌نین اثرلرینه ده آلچالدیجی باخیشلا یاناشدیغینی اونون صنعت دونیاسینداکی گئدیشاتی‌نین منفی یؤنده اولماسینا سبب کیمی گؤستریر.
بسته‌کارین فیکرینجه اوّلکی اعتراض‌لاردان سونرا بابک نهرینین تنقیدچی‌لری اونون آرتیق اؤز سهوینی باشا دوشدویونو دوشونوردولر. لاکین بوتون بو باش وئرنلر داها جدی تنقیدین واجیبلیگینی گؤستریر.
آشیق موشقولات
موباحیثه‌لرین یاراندیغی گون‌لرده قوزئیلی آشیق موشقولات آدلی بیر شخصین ویدئولاری دا یاییلماغا باشلادی. بابکین چیخیشینی مودافیعه ائد‌نلر اوخشار ظارافات‌لارین قوزئیده ده اولدوغونو، لاکین اورادا ناراضیلیق دوغورمادیغینی دئدیلر.
آریا تورکانبورلو ایسه بو توتوشدورمانی سهو حساب ائدیر. گونئیلی ائتنو-موسیقی‌شوناس دوشونور کی بیر جمعیتده نورمال قارشیلانان مسئله باشقا جمعیت‌لرده آنورمال حساب ائدیله بیلر و بو هر شئیدن اول جمعیتله باغلی مسئله‌دیر. او بونا موختلیف نومونه‌لر ده گتیریر. مثال اوچون “یاشا آذربایجان” ماهنیسی قوزئیده عادی بیر ماهنی حساب ائدیلدیگی حالدا گونئیده میللی حرکاتین سیموولو، میللی مارشدیر. قوزئیده بو ماهنی اونلارلا عادی میللی ماهنیدان بیریدیر. لاکین گونئیده بو ماهنی دئمک اولار کی میللی هیمن اولاراق قبول ائدیلیر.
آریا تورکانبورلونون فیکریجه قوزئیده میللی دؤولتین وارلیغی نتیجه‌سینده دیل و مدنیت اولدوغو کیمی قورونور و اورادا بونلارین محو اولماق تهلوکه‌سی یوخدور. لاکین گونئیده یئریدیلن آسیمیلاسیون سیاستی آذربایجانلی‌لارین مدنیتینی هدف آلیب. بو ایسه جمعیتین داها حساس اولماسینا سبب اولوب. دئمه‌لی قوزئیده آشیق موسیقیسی ایله ظارافات جمعیتده و اینجه‌صنعت خادیم‌لرینده هانسیسا ناراضیلیغا سبب اولمور، لاکین گونئیده محو اولماق تهلوکه‌سی ایله قارشی قارشییا اولان آشیق صنعتی ایله ایسته‌نیلن ظارافات ائدیله بیلمز.
هر یئرده ظارافات؟
حاقیندا دانیشیلان “جوکر” وئریلیشی فارسجادیر و تهراندا چکیلیر. بابک نهرینین بو چیخیشینی مودافیعه ائد‌نلر صنعتکارین آشیق موسیقیسی ایله ظارافات ائتدیگینی دئییرلر.
آریا تورکانبورلو بونونلا باغلی دئییر کی حال-حاضیردا ایراندا تورک‌لره قارشی آپاریلان مرکزیتچی و عیرقچی سیاست نتیجه‌سینده آشیق موسیقیسی محو اولماق تهلوکه‌سی ایله اوزله‌شیب. بئله بیر وضعیتده آشیق صنعتینی تهرانین ان پوپولیار وئریلیش‌لرینین بیرینده، فارس‌لارین احاطه‌سینده گولونج شکیلده تقدیم اولونماسی بیر آزربایجانلی‌نین ایروان شهرینده قاراباغ شیکسته‌سینی گولونج ایفا ائتمه‌سی کیمی بیر شئی‌دیر. بونو دونیانین هاراسیندا و یا هانسی اؤلکه‌سینده قبول ائدرلر؟
صنعتکار دقتلی اولمالیدیر
بابک نهرینین آشیق کیمی چیخیشینی مودافیعه ائد‌نلر اونون کئچمیشینی خاطیرلاداراق تنقیدلری یئرسیز حساب ائدیرلر. “بو همین بابکدیر کی” سؤزلری ایله باشلایان جمله‌لر بابکین گله‌جه‌یینی قالخان کیمی قورویور.
آریا تورکانبورلو بابک نهرینی پوپولیار صنعتکار حساب ائدیر و پوپولیار صنعتکارین داها دقتلی داورانمالی اولدوغونا اینانیر. اونون فیکرینجه پوپولیار صنعتکار وارلیغینی خالقا بورجلودور و او هر آن همین خالق طرفیندن چاتدیغی یوکسکلیکدن ائندیریله ده بیلر. دئمه‌لی بو کیمی شخص‌لر داها دقتلی اولمالیدیرلار.
بابک نهرینین تنقیدچی‌لری و مودافیعه‌چی‌لری آراسیندا رادیکال مؤقعده چیخیش ائد‌نلر ده اولدو. بعضی تنقیدچی‌لر اونو ایرانشهری کیمی فاشیست قوه‌لره باغلایاراق آغیر تنقید ائدیرلر، دیگرلری ایسه اونون تنقیدچی‌لرینی خالق دوشمنی کیمی گؤستریرلر. آریا تورکانبورلو ایسه هر ایکی طرفین رادیکال مؤقعده اولماسینی تنقید ائدیب.
اونون فیکریجه بابک نهرین و هر هانسی باشقا بیر صنعتکاری نه سیلیب آتماق و نه ده عزیزله‌ییب ال‌چاتماز ائتمک لازیم دئییل. اونون سهو آددیم‌لارینی تنقید ائتمک، دوغرو آددیمینی ایسه آلقیشلاماق لازیمدیر. لاکین هر ایکی حالدا نه اونو، نه ده اونو تنقید ائد‌نلری خالق دوشمنی کیمی دیرلندیرمک اولماز.
