حسین محمدزاده صدیق ۷۷ یاشیندا وفات ائدیب. او دورمادان چالیشان، آذربایجانین موعاصیر تاریخینده خصوصیله سئچیلن آزسایلی یازیچی‌لاریندان بیری ایدی. دکتر صدیق گنجلیک ایل‌لریندن باشلایاراق عؤمرونون سونونادک یازیب یاراتماقدان قالمامیش، آذربایجان تاریخی و مدنیتی یولوندا اهمیتلی آددیم‌لار آتمیشدیر.
۱۳۲۴-جی ایلده تبریزین سیرخاب محلله‌سینده دونیایا گؤز آچان دکتر صدیقدن بو گونه‌دک یوزلرله تاریخی، تورکولوگیا، دیلچیلیک، ادبیات و دیگر ساحه‌لرده اثرلر آذربایجانا ارمغان ائدیلمیشدیر. او گنجلیک ایل‌لریندن باشلایاراق اؤز آنا دیلی اولان آذربایجان تورکجه‌سینه دریندن باغلانمیش، آسیمیلاسیون سیاستی قارشیسیندا و آذربایجان تورکجه‌سی‌نین یوخ اولماماسی یولوندا صداقتله فعالیت گؤسترمیش، بو یولدان هئچ واخت دؤنمه‌میشدیر. همین واخت‌لاردان باشلایاراق گونئیین موختلیف اینتلکتوال‌لاری و یازیچی‌لاری ایله علاقه ساخلامیش، پهلوی رئژیمی‌نین قارانلیق دؤورونده ایشیغا چئوریلمیشدیر.
۱۳۵۷-جی ایل اینقیلابیندان سونرا دا اؤز فعالیتینی دایاندیرمامیش، همین دؤورده بیر نئچه تورکجه ژورنالی نشر ائتمه‌یه باشلامیشدیر. داها سونرا ایستانبول اونیوئرسیته‌سینده اسکی تورک دیلچیلیگی اوزره یوکسک لیسانس، داها سونرا ایسه تورک، فارس و عرب دیل‌لری آراسیندا موقاییسه‌لی ادبیات ایختیصاصیندا دوکتورلوغونو بیتیرمیشدیر.
اونیوئرسیته ایل‌لریندن سونرا ایسه یورولماق بیلمه‌ین یازیچی اؤز فعالیتینه داوام ائتمیشدیر. ۷۷ ایللیک عؤمرونون سونونادک دورمادان یوزلرله موختلیف ساحه‌لرده تالیف، ترجومه و رئداکته اثرلرینه ایمضا ووران صدیق تیرین ۲-ده بو دونیایا گؤز یومموشدور.
