دونیانین بیر چوخ مدنیت‌لرینده میلیاردلارلا اینسان اوچون جینس و گئندئر آسانلیقلا ایکی کاتئقورییایا بؤلونور. اینسان‌لارین هامیسی یا بیر اوغلان اولاراق و یا بیر قیز اولاراق دوغولور. بو قدر ساده‌دیر مسئله اونلار اوچون. آنجاق بو، حقیقتدن اوزاقدیر. جینس و گئندئر ایکیلی دئییل و بو بیر سوسیال قورولوشدور (اینسان‌لار و اجتماعی قوروجولوق طرفیندن یارادیلمیشدیر). گئندئر ایکیلیلیگی طبیعی دئییل، جمعیت طرفیندن قویولور و تنظیمله‌نیر.
گئندئر بیناری یا دا گئندئر ایکیلیگی، اینسان‌لارین ایکی اساس، بیولوژیک جهتدن معین ائدیلمیش فورمادا، یعنی کیشی و قادین اولاراق، مؤوجود اولماسی فیکرینه ایستیناد ائدیلیر. طبیعتده یالنیز ایکی جینسین اولدوغو اینانجیدیر.
گلین اوّلجه جینسیت دئدیکده نه‌یی نظرده توتدوغوموزدان و گئندئر دئدیکده نه‌یی نظرده توتدوغوموزدان دانیشاق. جینسیت، عادتن بیر شخصین بیولوژی قورولوشونا دایانیر. ایسپئسیفیک رئپرودوکتیو(اؤزل تولید مثل) ارگان، کروموزوم ترکیبی و هورمون‌لار کیمی بیر چوخ فاکتورون بیر آرایا گلمه‌سی ایله فورمالاشیر.
دیگر طرفدن، گئندئر اینسانین اؤزونو نئجه تانیدیغینی ائحتیوا ائدیر و بونا گؤره ده ایکیلی دئییل. گئندئر، جمعیتین کیشی‌لر و قادین‌لار اوچون اویغون حساب ائتدیگی سوسیال جهتدن قورولموش رول‌لار، داورانیش‌لار و آتریبوت(فلسفه‌ده حادیثه‌نین داییمی و آیریلماز خاصه‌سی، علامتی)-لاردیر. گئندئر، عینیله قانون کیمی اؤیره‌دیلیر، تطبیق ائدیلیر و تابع اولمادیقدا جزالاندیریلیر. گلین بونلاری میثال‌لارلا آنلایاق.
بیر کیشی تصوور ائدین. ایندی بیر قادین تصوور ائدین. نه گؤرورسونوز؟
سیز یقین کی، بیر آز ایری، قیسا ساچلی، بلکه ده ساققاللی بیر اینسانی تصوور ائتدینیز. نه گئیینیردی؟ شالوار و کؤینک؟ بلکه داها ظریف، جین شالوار ایله کراوات؟ بد‌نی نئجه‌دیر؟ بویلودور؟ قارنی وار؟ بو آدامین بدنینده توک وار؟ ایندیکی گنج‌لر کیمی «آلتیلی پرئس»-لیدیر، یا بؤیوک قارنی وار؟
من قادین دئینده، بلکه سیز بیرآز فیزیکی اولاراق داها کیچیک بیر اینسان تصوور ائتدینیز. ۱۰۰% ساققالی دئییلدی، اصلینده موطلق بدنی‌نین هر یئرینده توکسوزدور. طبیعی کی، اونون باشی استثنا اولماقلا! یقین کی، اوزون، گور ساچلی تصوور ائتدینیز. اونون ماکیاژی وار ایدی؟ بلکه سیز ساده‌جه بیر آنانی تصوور ائتدینیز، قادینی اینسان دئییل، ساده‌جه آنا گؤر‌ن بیر چوخلاری کیمی.
بیز چوخ گنج یاشدان کیشی و یا قادین یاراتماغا باشلاییریق. ایلک دئمک ایسته‌دیگیم، اوشاق‌لار ایلک نؤوبه‌ده والیدئین‌لریندن و اونلارین داورانیش‌لاریندان اؤیره‌نیرلر. چونکی، هر بیر والیدئی‌نین، کیشی و یا قادین اولماغین نه اولدوغونا دایر اؤز آنلاییشی وار. سئچدیگیمیز گئییم‌لرین رنگ‌لریندن و نؤوع‌لریندن توتموش، اونلاری آکسئسوارلارلا(لوازم جانبی ایله) بزه‌مه‌یه قدر، اونلارا نئجه گؤرونمه‌لی اولدوقلارینی اؤیرتمه‌یه باشلاییریق. اونلارا اویونجاق آلاندا اوغلان‌لارا ماشین و روبوت‌لار آلیریق، قیزلاریمیزا ایسه گلینجیک‌لر، «باربی»-لر و کوکلا ائولری آلیریق.
اونلارا دئدیگیمیز یا اوخودوغوموز ناغیل‌لار دا یاددان چیماسین. عادتن بیز شاهزاده‌لرین کیشی طرفیندن خیلاص ائدیلمه‌سی حاقیندا ناغیل اوخویوروق. بیز اوغلان‌لارا قهرامان اولماغی اؤیره‌دیریک. قیزلاریمیزا نه اؤیره‌دیریک بو میثالدا؟ قیزلاریمیزا بیرینه باغلی اولماغی اؤیره‌دیریک. آیدیندیر کی، بیز اونلارا اؤز آیاق‌لاری اوزَرینده دایانماغی اؤیرتمیریک.
گئییم‌لری و خاریجی گؤرونوشو ایله یاناشی، بیز اونلارا جینسیته اویغون داورانیش‌لاری دا اؤیره‌دیریک و عمل ائتمه‌دیکده اونلاری جزالاندیریریق. مثلاً، بیز اوغلان‌لاریمیزا گوجلو اولماغی اؤیره‌دیریک. اونلارا «کیشی‌لر آغلاماز» کیمی یانلیش سؤزلر دئییریک. اونلار بیرآز داها حلیم، یومشاق، مولاییم، تعریفلی و یا اونسیتجیل اولدوقدا، جمعیت اولاراق جزالاندیریریق کیشی‌لری. بیز اونلارا آدلار قویوروق و قونشوموز تورکیه‌دن گلن «لایت ائرکئک» کیمی اییرنج سؤزلر دئییریک.
قارشیلیغیندا بو بیر چوخ پسیخولوژی و سوسیال علاقه پروبلئم‌لرینه سبب اولور. بیز اوغلان‌لارا حیس‌لرینی ساغلام شکیلده ایفاده ائتمه‌یی اؤیرتمیریک، عکسینه، اونلاری نئجه باسدیرماغی اؤیره‌دیریک. آنجاق بیر یئره قدر ایته‌له‌یه بیلرسینیز بو حیس‌لری. کیشی آرتیق بو گوجلو دویغولاری (سئوگی، ایتکی، کدر، هیجان، قیسقانجلیق و سایره) ساخلایا بیلمه‌ینده، اونلارا اؤیره‌دیلن یئگانه یولو سئچیر: قیشقیرماق و چیغیر-باغیر. بیز اونلارا سئوگی‌لرینی ساغلام شکیلده نئجه ایفاده ائتمه‌یی بئله اؤیرتمیریک. بیر نؤوع اونلارین اینسانلیغینی و ظعیفلیگینی اونلاردان آلیریق. سئکسیزمدن دانیشاندا چوخلاری اونودور کی، کیشی‌لر ده پاتریارخال سیستئمده بیر چوخ منفی تأثیره معروض قالیرلار.
بنزر، لاکین چوخ شیشیردیلمیش شکیلده، بیز ده قادینین اولماسی لازیم اولانی یارادیریق. قادین یوکسک سسله دانیشا بیلمز. قادین کؤک اولا بیلمز. قادینین بدنینده توک اولا بیلمز. قادین داغینیق اولا بیلمز. جمعیت اولاراق بیز کیشییه خیدمت ائد‌ن قادینلیق ایدئیاسینی یارادیریق. بیز قادین‌لاری ایلک نؤوبه‌ده اینسان کیمی دئییل، اوشاق دوغوران ماشین کیمی گؤروروک. آیدینلاشدیرماق اوچون، بورادا آنالیغی دیرسیزلشدیرمیرم. بو مقامی وورغولاییرام کی، آنالیق سئچیمدیر، اونو مجبور ائتمک اولماز. قادین‌لار هر شئیدن اوّل اینساندیر. اینسان‌لار اولاراق، اونلارا اؤزلری اوچون نه ایستک‌لری وارسا، اونلارین آرخاسینجا گئتمک ایمکانی وئریلمه‌لیدیر. بو آنا، عالیم، ائودار قادین، معلم و یا مئکانیک اولا بیلر.
بعضی حرکت‌لریمیزله جمعیتیمیزه ایکی‌اوزلو قیلینج کئچیریب معین نورمالار واسیطه‌سیله هم کیشی‌لری، هم ده قادین‌لاری جزالاندیریریق. مثلاً، آروادیندان آز قازانان کیشی‌لری اله سالیریق. بیز اونلارا داها اسکیک کیشی کیمی باخیریق. بو فیکیر دئییر کی، قادین‌لار کیشی‌لردن داها یاخشی و یوکسک پئرفورمانسلی بیر ایشی یئرینه یئتیره بیلمه‌مه‌لیدیرلر. بو، کیشی‌لریمیزه دستک اوچون حیات یولداشینا گوونمه‌یین دوزگون اولمادیغینی سؤیله‌ییر. حیاتین مسئولیتینی یالنیز کیشی‌لرین اوزَرینه قویور. بیر کیشی ایقتیصادی تنزول کیمی اؤز نظارتیندن کنار وضعیت‌لره گؤره کیفایت قدر پول قازانمادیقدا، بیز هله ده کیشی ایله پروبلئم گؤروروک. بو، قادین‌لارین ایشله‌مکدن چکینمه‌سینه گتیریب چیخاریر و قادین‌لارین اری و یا کاریئراسی آراسیندا سئچیم ائتمه‌سینه سبب اولور. ارین کاریئراسی همیشه اؤن پلاندادیر.
بو چوخ درین مؤوضوعدور و بو مقاله‌ده قئید اولونانلارین هامیسی عمومی شکیلده ائدیلیب. آنجاق قادینلیق و کیشیلیگین جمعیت طرفیندن قورولدوغونو باشا دوشه بیلسک، بو رول‌لارا قویولان ساختا ائتیکئتین دئکونستروکسییاسینا(ساختارشکنی) باشلایا بیله‌ریک. بو هم ده کوئیر، ترانس‌گئندئر و غیر بینار اولماغین نه دئمک اولدوغونو باشا دوشمک اوچون اساسدیر. گله‌جک یازی‌لاریمدا بو مسئله‌لری موذاکیره ائدیب ایضاح ائده‌‌جه‌یم. واخت آییریب دینله‌دیگینیز اوچون تشککور ائدیرم.
