چئويرن: دانسو جبارلي
فرانسيز سوسيولوق پيئر بورديونون (1930-2002) دوشونجه‌لري، قوزئي آمئريکا ايله ياناشي بير چوخ يئرده گئنيش شکيلده طرفدارلار تاپميشدير. گنج بورديو، الجزايرين فرانسادان موستقيل اولماق اوچون موباريزه آپارديغي ايللرده او اؤلکه‌ده ساحه چاليشماسي ايله مشغول اولموشدور. بو گون، عاليملر بورديونون تحقيق مئتودلاري ايله ياناشي اونون نتيجه‌لريني ده اوخويورلار.
بورديو، بير چوخ فورماسي اولان سرمايه‌نين فردلر و عايله لري نسيلدن نسيله نئجه آياقدا توتدوغو حاقيندا يازيردي. بورديو اوچون سرمايه صيرف ماددي امتعه(کالا) دئييل، هم ده کولتورل و سوسيال وارليقدير.
کولتورل سرمايه، عايله کئچميشي و تحصيل کيمي ائکونوميک اولمايان بير سرمايه‌دير. بو سرمايه، فرقلي ديللر بيلمک و صنعتلر حاقيندا بيلگيلي اولماق فورمالاريندا اؤزونو گؤسترر. بو بيلگي‌نين کيتاب بيلگيسي اولماسي دا شرط دئييل، کولتورل سرمايه سوسيال ائليتلرين دير وئرديگي بيلگي و ساوادا ايشاره ائدير. ميثال اوچون، چين مطبخي بير کولتور اولسا دا، ائليت طرفيندن پرستيژلي بير کولتور نؤوعو ساييلمير. آمئریکادا، موهاجيرلرين- خوصوصييله چوخ ساييدا گليب اؤز ائتنيک‌لرينين ياشاديغي بؤلگه‌لرده يئرلشنلر- اسکيدن گلميش قروپلارلا عئيني سويه‌ده کولتورل سرمايه‌يه صاحيب اولمالاري عوموميتله ايکي-اوچ نسيلدن سونرا مومکون اولور.
سوسيال سرمايه ايسه قارشيليقلي اعتيماد اساسيندا قورولان سوسيال علاقه‌لرين کوللئکتيو فايداسينا ايشاره ائدير. عايله و دوستلوق علاقه لرينين اينسانلارا اينکيشاف ائتمکده فورصت ياراتماسي حاقيندا اولدوقجا چوخ يازيلميشدير. بورديونون کولتورل و سوسيال سرمايه‌لره وورغوسو، ماکس وبر کيمي موتفکيرلرين عرصه‌يه گتيرديکلري آنلاييشلاري گئنيشلنديردي.
بو گون ده سوسيولوژي‌ده، ايلکين نظريه‌چيلرين فرقلي قاتقيلاري يانسيماقدادير. سوسيولوقلار بوشانما، نارکوتيک آسيليليغي، ديني فيرقه‌لر کيمي مؤوعضولاري آراشديرماق ايسته‌ينده بو ديسيپلينين اؤنجوللري‌نين نظريه‌لريندن يارارلانا بيليرلر. ديقتلي بير اوخوجو، اينديکي تدقيقاتلارين صحيفه لريندن کومته، دورکهايم، وبر، مارکس، دوبويس، کولي، آدامس و بير چوخونون سسيني ائشيده بيلر. سوسيولوژی داها قوزئي آمئريکا و آوروپانين اينتئللئکتوال حودودلاريني آشميشدير. ايندي دونيانين باشقا بؤلگه‌لرينده اوخويوب، اينسانلارين داورانيشيني آراشديرانلار بو ديسيپلينه تؤحفه‌لر وئريرلر.
قايناق: Sociology in Modules by Richard T. Schaefer
