بدنلریمیز اؤزوموز: دوغوشا دایر حاقلار

چئویرن: تورکان اورمولو

گونوموزون فمینیست حرکتی باشلادیغیندا، اَله آلینماسی اَن اویغون گؤرولن مسئلهلر بیرباشا، (بیر چوخ مادی آنلامدا دا امتیازلی اولان) یاخشی ائییتیم آلمیش، آغدریلی قادینلارین تجربهلرینه باغلی ایدی. فمینیست حرکت وطنداشلیق حرکتینین و جنسل اؤزگورلشمهنین ایزینی تعقیب ائتدیگی اوچون، او دؤنمده قادین بدنی قونوسونداکی مسئلهلری اؤنپلانا آلماغی داها اویغون گؤردو. کوتله مئدیاسی، فمینیست حرکتی آمئریکا گؤزللیک یاریشماسینین قوتلاما تؤرنلرینده کرسئتلرینی یاندیران قادینلار ایله باشلاییب آبورت (سقط جنین) سیراسیندا گؤزلهین قادینلار ایله داوام ائدن بیر حرکت اولاراق سونماغی سئچدی، اما حرکتین اولوشومونو سرعتلندیرن مسئلهلردن بیری جینسللیک ایدی و بورادا سؤزقونوسو اولان، قادینلارین جینسللیکلرینی نه زامان و کیمینله یاشایاجاقلارینی سئچمه حاقلاری ایدی. سوسیالیست حرکت و یا وطنداشلیق حاقلاری حرکتی، بوتون رادیکال حرکتلرده، قادین بدنلرینین جنسل سؤموروسو چوخ راستلانان بیر دوروم ایدی.
جنسل دئوریم (انقلاب) اولاراق آدلاندیریلان حرکت زیروهدیکن، (گئنلده ایستهنیلن شخصله ایستهنیلدییی قدر جنسل ایلیشکی آنلامینا گلن) اؤزگور عشق مسئلهسی قادینلاری ایستهنیلمهین حامیلهلیک سورونو (مسئله) ایله اوز-اوزه گتیریردی. اؤزگور عشق مسئلهسینده توپلومسال جنسیت ائشیتلیگینین یارادیلماسی اوچون قادینلارین اؤنجهلیکله گوونلی، ائتکیلی دوغوم کنترل یؤنتملرینه (مئتودلارینا) و آبورتا احتیاجلاری وار ایدی. صینفی امتیازا صاحب اولان آغدریلی قادینلار، شخصی اولاراق گئنللیکله بو گوونلییی یارادا بیلیردیلر، اما بیر چوخ قادینین بئله بیر امکانی یوخ ایدی. گئنللیکله صینفی آیریجالیغا (امتیازا) صاحب اولان قادینلار دا ایستهنیلمهین حامیلهلیک دوروموندان چوخ اوتاندیقلاری اوچون گوونلی طبی حاقلاریندان یارارلانا بیلمیردیلر. ۱۹۶۰-نجی ایللرین سونلاریندا و ۱۹۷۰-نجی ایللرین باشلاریندا آبورت حاقی اوچون مبارزه ائدن قادینلار، یاسال (قانونی) اولمایان یوللار ایله گئرچکلشدیریلن آبورت تراژدیلرینی و ایستهنیلمهین حامیلهلیکلرین سونوجو اولاراق زورلا اولان ائولیلیکلرین یاراتدیغی ایضطیرابی گؤرموشدولر. بیر چوخوموز، یاشاملاری پلانلانمامیش و ایستهنیلمهین گبهلیکلر (حامیلهلیکلر) ایله آلت-اوست اولان یئتهنکلی، یارادیجی قادینلارین اوشاقلارییدیق. آنالاریمیزین، حیاتداکی آلین یازیلارینا قارشی دویدوقلاری ناراحاتلیغا، خیال قیریقلیغینا و آجییا تانیق (شاهد) اولدوق. قادین و ائرککلر اوچون گئرچک جنسل اؤزگورلشمهنین، داها یاخشی و گوونلی دوغوم کنترل یؤنتملری، گوونلی و یاسال آبورت حاقی اولمادان گئرچکلشمهیهجهییندن آرخایین ایدیک.
گئرییه دؤنوب باخدیغیمیز زامان، بیر بوتون اولاراق دوغوشا دایر حاقلاردان چوخ آبورتون اؤنپلانا چیخاریلماسی، حرکتین اؤن سیرالاریندا یئر آلان قادینلارین صینفی اؤنیارقیلارینین(پیشداوری) بلیرلهییجی اولدوغونو گؤستریر. آبورت مسئلهسی بوتون قادینلاری ایلگیلندیرسه ده، دوغوش ایله ایلگیلی، کوتلهلری حرکته کئچیرمکده فایدالی اولان و اؤنمسنمهسی گرکن، باشقا یاشامسال مسئلهلر ده وار ایدی. بو مسئلهلر، تمل جنسل ائییتیمدن دوغوم اؤنجهسی باخیمینا، قادینلارین قورویوجو حکیملییه، زورلا اویغولانان قیسیرلاشدیرماغا، گرکسیز سئزاریینه و یا رحمین عملیاتلا آلینماغینا و بونلارین یول آچدیغی طبی فسادلارا قدر اوزانیردی. صینفی امتیازا صاحب اولان آغدریلی قادینلار، بو مسئلهلر آراسیندا اَن چوخ ایستهنیلمهین حامیلهلیگین یول آچدیغی آجی ایله اؤزدئشلهشیر (همذات اولور) و آبورت مسئلهسینی اؤن پلانا چیخاردیردی، آمما گوونلی و یاسال آبورتا چاتماغا احتیاجی اولان تک قروپ اونلار دئییلدی. داها اؤنجه ده بلیرتیلدیگی کیمی، یوخسول و ایشچی صینفیندن اولان قادینلارا قیاسلا آبورت ائتدیرمک شانسلاری داها یوکسک ایدی. او گونلرده، قارادریلی قادینلار دا داخل اولماق اوزره یوخسول قادینلار گئنلده غئیری- رسمی اولاراق آبورت ائتدیرمهیین یوللارینی آختاریردیلار. آبورت حاقی، سادهجه آغدریلی قادینلارین مسئلهسی اولمادیغی کیمی آمریکالی قادینلارین بیر چوخو اوچون، دوغوش ایله ایلگیلی تک و یا اَن اؤنملی مسئله ده دئییلدی.
بیر چوخو جنسیتچیلیک قارشیتی (مخالفی) اولمایان ائرکک بیلیم اینسانلارینین طرفیندن ده تنقید ائدیلن، تماما گوونلی اولماسا دا ائتکیلی دوغوم کنترل حبلری، قادینلارین جنسل اؤزگورلشمه مبارزهلرینده آبورت حاقیندان داها ائتکیلی اولوبدور. دوغوم کنترل حبلری ایلک دفعه یایقین بیر شکیلده ایشلتیلمهیه باشلاندیغیندا منیم کیمی ایگیرمییاشا یاخینلاشمیش اولان قادینلار، ایستهنیلمهین حامیلهلیکلرین قورخوسوندان و اوتانجیندان قورتولموشدولار. سوروملو (مسئول) بیر شکیلده اویغولانان دوغوم کنترلو، منیم کیمی، قادینلارین آبورت سئچیمی حاقینی ساوونان، آمما اؤزو اوچون آبورتو چوخ دا ترجیح ائتمهین قادینلاری، بو سورونلا شخصاً اوزلشمکدن قورتارمیش اولدو. من، جنسل اؤزگورلشمهنین ان پارلاق دؤنمینده، ایستهنیلمهین حامیلهلیک سورونو ایله هئچ قارشیلاشمادیم، اما دستلاریمین چوخو دوزنلی اولاراق ایشلهدیلن دوغوم کنترل حبلری ایله قیاسلا آبورتو داها یاخشی بیر سئچهنک اولاراق گؤردولر. چوخ واخت، آبورت بیر دوغوم کنترل یؤنتمی اولاراق ایشلهدیلیر. هر زامان ایشلتمک، قادینین آکتیو بیر جنسل یاشام یؤنوندهکی ترجیحی ایله بیرباشا اوزلشمهسی آنلامینا گلیر. ائرککلر دوغوم کنترلو قونوسوندا دقت ائدن قادینلاری گئنللیکله یونگول قادین اولاراق گؤروردولر. بعضی قادینلار اوچون جنسل آنلامدا ایشلری آخیمینا بوراخماق و «سورون»او سونرا آبورتلا چؤزمک داها رحت اولوردو. بو گون، چوخ تکرارلانان آبورتون دا، اوزون سوره ایشلهدیلن یوکسک درجهده استروژنلی اولان دوغوم کنترل حبلرینین ده ریسکسیز اولمادیغینی بیلیریک. یئنه ده قادینلار جنسل اؤزگورلویه اولاشماق و اؤز سئچیملرینی اؤزلرینین ائتمهسی حاقینا صاحب اولماقلاری اوچون ریسک آلماغی اوستون گؤرورلر.
آبورت مسئلهسی، کوتله مئدیاسینین ایلگیسینی چکدی؛ چونکی خیریستیانلیغین کؤکدنچی (رادیکالیست) دوشونجه بیچیمینه گئرچکدن ده میدان اوخودو. بیر قادینین وارلیق ندهنینین اوشاق بؤیوتمک اولدوغو دوشونجهسینه بیرباشا قارشی چیخیردی. آبورت مسئلهسی، توپلومون ایلگیسینی قادین بدنینه ائله یؤنلتدی کی، باشقا هئچ بیر مسئله بو قونودا داها باشاریلی اولا بیلمزدی. بیرباشا کیلسهنین قارشیسیندا دوروردو. سونرالار کوتله مئدیاسی فمینیست دوشونجهلرین دقت ائتدیگی، دوغوش ایله ایلگیلی باشقا مسئلهلری گئنللیکله گؤرمزدن گلدی. قادینلارین سئزاریینده و رحمین چیخاردیلماغیندان دولایی چکدیکلری چتینلیکلر کوتله مئدیاسی اوچون ماراقلی دئییلدی. چونکی بونلار، قادینلارین بدنینی کونترول آلتینا آلان و بو بدنلر ایله نه ائتمک ایسترسه اونو ائدن کاپیتالیست، آتااَرکیل و ائرکک ائگمن تیپ سیستمینی گوندمه گتیریردی. بو آلانلارداکی توپلومسال جنسیت عدالتسیزلیگینه اوداقلانماق، چوخ محافظهکار و چوخ آنتیفمینیست دوروشونو بو گون ده سوردورن کوتله مئدیاسی اوچون، چوخ رادیکال بیر آددیم اولاردی.
۱۹۶۰-نجی ایللرین سونلارینداکی و ۱۹۷۰-نجی ایللرین باشلارینداکی فمینیست آکتیویستلر، بیز قادینلارین ۱۹۹۰-نجی ایللرینده دوغوشا دایر حاقلارلا ایلگیلی بیر مبارزه آپارماق مجبوریتینده قالاجاغیمیزی دوشونه بیلمزدیلر. فمینیست حرکت، نسبتا آز ریسکلی دوغوم کنترل یؤنتملرینی قبول ائتدیرمک ایله بیرلیکده، گوونلی و یاسال آبورت حاقینی قازاندیران بیر کولتورل دئوریم گئرچکلشدیردیکدن سونرا، قادینلار بو حاقلارین بیر داها سورغولانمایاجاغینی دوشوندولر. اؤرگوتلو، رادیکال فمینیست کوتله اساسلی پولیتیک حرکتین بیتمهسی، دینی کؤکدنچی بیچیمده یوروملایان اؤرگوتلو ساغ قاناد پولیتیک جبههنین آنتیفمینیست طرزی ایله بیرلشینجه، آبورت یئنیدن سیاسی گوندمه گتیریلدی. قادینلارین سئچیم حاقی آرتیق سورغولانا بیلن حالا گلمیشدی.
آبورتا قارشی اولان پلتفرم، تأسفله اَن چوخ دا دولتین قارشیلادیغی، اوجوز و گرکدییینده پولسوز ائدیلن آبورتو هدهلهییبدیر. سونوج اولاراق، مادی آنلامدا ضررلی دورومدا اولان قادینلار آجی چکرکن، هر عرقدن صینفی امتیازا صاحب اولان قادینلار، گوونلی آبورتا اَل تاپماق شانسینی، یعنی سئچیم حاقینی اَلینده توتماقدادیر. دوغوشا داییر حاقلارلا ایلگیلی طبی باخیم اوچون حکومت دستهیی اولمادیغی زمان، یوخسول و ایشچی صینفینه منسوب اولان قادینلار آبورت ائتدیرمک اولاناغینی ایتیرمکدهدیر. آبورت چوخ بؤیوک پوللار قارشیلیغیندا ائدیلمهیه باشلاندیغیندا، صینفی امتیازا صاحب اولان قادینلار اؤزلرینی تهلوکهده حس ائتمهییر، چونکی هله ده آبورت ائتدیره بیلرلر. آنجاق چوخ واخت قادینین صینفی گوجو اولمور. بو گون اسکیسیندن داها چوخ قادین، یوخسوللارین و محتاجلارین صینیفلرینه قاتیلیر. گوونلی، اوجوز و یا پولسوز آبورت حاقی اولمادان، بدنلرینین اوستوندهکی بوتون کنترلو الدن وئریرلر. آبورت، سادهجه چوخ پولو اولانلار طرفیندن ائدیله بیلر حالا گلیرسه، آبورتو یاسادیشی (قانونسوز) ائتمهیی هدفلهین توپلومسال پولیتیکالارا گئری دؤنمک ریسکینی داشیییریق دئمک. بو، بو آندا اونسوز دا بیر چوخ محافظهکار اؤلکهده گئرچکلهشیر. هر صینیفدن قادین، آبورت گوونلی، یاسال و هر قادینین آلیم گوجونه (قدرت خرید) اویغون حالا گتیرمه مبارزهسینه دوام ائتمهلیدیر.
قادینلارین آبورت ائتدیریب-ائتدیرمهمهیی سئچمه حاقینین اولماسی، دوغوش اؤزگورلویونون یالنیزجا بیر بویوتودور (جنبهسیدیر). دوغوشا دایر هانسی حاقلارین داها اؤنملی اولدوغو، قادینین یاشینا و یاشام شرطلرینه گؤره دَییشر. ایگیرمی و اوتوز یاشلاریندا، جنسل آنلامدا آکتیو اولان و دوغوم کنترل حبلرینی گوونسیز گؤرن بیر قادین، بیر گون ایستهنیلمهین گبهلیک (حامیلهلیک) سورونو ایله اوزلشه بیلر و یاسال، گوونلی و هر قادینین آلما گوجونه اویغون آبورت حاقی، اونون اوچون اَن اؤنملی دوغوش مسئلهسی حالینا گله بیلر، اما مئنوپوز (یائسهلیک) چاغینا گلدییینده و دکترلار رحمینین آلینماسی گرکدییینی سؤیلهدییینده، بو، دوغوشا داییر اَن اؤنملی حاق مسئلهسینه دؤنه بیلر.
بیزلر کوتلهوی (تودهای) فمینیست حرکتی یئنیدن جانلاندیرمانین یوللارینی آرایارکن دوغوشا دایر حاقلار دا فمینیست گوندمین مرکزینده قالاجاقدیر. بیز قادینلار بدنیمیز ایله ایلگیلی سئچیم ائتمه حاقینا صاحب اولماساق، یاشامیمیزین باشقا آلانلاریندا (ساحهلرینده) دا حاقلاریمیزدان واز کئچمک ریسکی دوغولار. یئنیلنمیش فمینیست حرکتده، دوغوشا دایر حاقلار دیگر هر هانسی بیر مسئله قارشیسیندا اؤنجهلیک قازاناجاقدیر. بو، یاسال، گوونلی و هر قادینین آلما گوجونه اویغون آبورت حاقی مرکزده اولمایاجاق آنلامینا گلمیر؛ اما مرکزه آلینان تک مسئله ده بو اولمایاجاقدیر. هر قادین جنسل ائییتیم، قورویوجو حکیم و دوغوم کنترل یؤنتملرینه راحاتلیقلا اَل تاپا بیلرسه، چوخ آزیمیز ایستهنیلمهین گبهلیکلر ایله قارشیلاشاریق. سونوج اولاراق، آبورت ائتدیرمه ائحتیاجی آزالار.
یاسال، گوونلی، هر قادینین آلدیرماق گوجونه اویغون اولان آبورت مسئلهسینده یئنیلمک، قادینلارین دوغوشا دایر حاقلارینین بوتونو قونوسوندا یئنیلمهسی آنلامینا گلهجکدیر. آبورت قارشیتی (مخالیفی) حرکت، رادیکال آنتیفمینیست بیر حرکتدیر. بو قادینین، شخصی اولاراق آبورت ائتدیرمهمه حاقی واردیر. آنجاق، فمینیست حرکته باغلیلیق، سئچیم طرفداری اولماق، آبورت ائتدیرمه احتیاجی اولان بیر قادینین بونو ائتدیرمه یا دا ائتدیرمهمهیی سئچمه حاقینی ساوونماق آنلامینا گلیر. ائتکیلی دوغوم کنترل یؤنتملرینه هر زمان صاحب اولموش، دولاییسییلا یاسادیشی یوللارلا ائدیلن آبورتلارین یاراتدیغی تراژدیلری هئچ گؤرمهمیش گنج قادینلار، قادینلارین دوغوشا داییر حاقلارا صاحب اولمامالاری حالیندا نئجه گوجسوز و سؤمورویه آچیق حالا گلهجکلرینی هئچ تجربه ائتمهدیلر.
هر یاشدان قادینلارین و مبارزهمیزده بیزه دستک وئرن ائرککلرین بو حاقلارین ندن اؤنملی اولدوغونو گؤرمهلری اوچون، «دوغوشا دایر حاقلار» باشلیغی آلتیندا یورودولهجک اطرافلی بیر دارتیشمانین اولماسی گرکیر. بو آنلاییش، بیزیم، دوغوشا دایر حاقلاری بوتون قادینلار اوچون بیر گئرچکلیک اولاراق قوروماق سؤزوموزون اساسیدیر. اؤزگورلویوموزو قوروماق و سوردورمک اوچون، دوغوشا داییر حاقلارا فمینیست بیر شکیلده اوداقلانمایا (متمرکز اولماغا) احتیاج واردیر.