19 مارت تاریخینده دونیانین ایکینجی ان بؤیوک کاریکاتور موزه‌سی اولان تبریز کاریکاتور موزهسینین اشیالاری و اثرلری اوغورلانیب. بو حاقدا «آذر انجمن» خبر آژانسی معلومات یاییب. یاییلان شکیللردن موزه‌نین تام بوشالدیلدیغی گؤرونور. خبر مدنيیت ساحه‌‌‌سی فعاللاری‌نین رئاکسییاسینا سبب اولوب.
موزه‌نین بو وضعيتی ایله باغلی تبریز کاریکاتور موزهسینین دیرئکتورو سعید پوریا امجدی فیکیر بیلدیریب. او موزه‌نین اوغورلوغا گؤره یوخ، تبریز شهر بلدییه‌سی ایله ایسلام مدنيیت اداره‌سی (ارشاد) آراسینداکی ایختیلافین نتیجه‌سینده بوشالدیلدیغینی قید ائدیب. سعید پوریا امجدی بو حاقدا بئله یازیر: «بیر نئچه ساعات اوّل تبریز کاریکاتور موزهسینین امکداشلاری موزه‌نین تامامیله بوشالدیلدیغینی اؤیره‌نیبلر. سون آیلاردا موزه‌نین و اینجه‌صعنت ائوینین بیناسی‌نین مولکیّتی ایله باغلی بلدییه ایله ایسلام مدنيتی اداره‌سی (ارشاد) آراسیندا موباحیثه یارانیب و بلدییه بو موزه‌نی ایکی دفعه بوشالتمایا تشبّوث گؤسترسه ده سون حادثه‌‌‌یه قدر بونون قارشیسی آلینمیشدی.»
تبریز کاریکاتور موزه‌سینده «موللا نصرالدین» ژورنالی‌نین اوبرازلاریندان بیرینه حصر ائدیلمیش هیکل
«دؤزمک چتین ایدی؟»
خبر یاییلاندان بیر نئچه ساعات سونرا تبریز کاریکاتور موزهسینین قوروجولاریندان اولان رحیم بقال اصغری اؤزونون اینستاگرام حسابیندا دؤولت اورقانلارینی کسکین تنقید ائتدیب بئله یازیب. او بو مسئله‌یه دؤولت اورقانی اولان بلدییه‌نین آرذبایجان مدنيّتینه قارشی آددیملاری‌نین داوامی اولاراق گؤرور و بونون اوچون ده رسمی اعتراض اولاراق رسمی قوروملارلا امکداشلیغی دایاندیرماق قراری وئردیگینی بیان ائدیب.
رحیم بقال اصغری بو حاقدا بئله یازیب: «15 ایل بوندان اول مین اومیدله بو موزه‌نی قورموشام، یوزلرله کیتاب باغیشلامیشام. اونلارلا بین الخالق فئستیواللاردا مینلرله اثر توپلاییب آرخیو‌لشدیرمیشم… او، «آذربایجان کاریکاتور موزه‌سی» آدلاندیریلدی. بونا دؤزمک چتین ایدی؟ تبریز بلدییه‌سی، فوتوقرافییا موزه‌سی و تبریز پئشه موزه‌سی ایله نه ائتدیسه آسیادا یئگانه کاریکاتور موزه‌سی اولان آذربایجان کاریکاتور موزه‌سی ایله ده او ایشی گؤردو. گئجه و گیزلیجه… رسمی قوروملارلا ایسته‌نیلن امکداشلیغا سون وئریرم. بایرام پاییمی آلدیم.»
تبریز کاریکاتور موزهسینین بیناسی
تبریز کاریکاتورا موزه‌سی نه زامان یارانیب؟
2007-جی ایلده تبریز اینجه‌صعنت ائوینده یارادیلمیش تبریز کاریکاتور موزه‌سی دونیانین بئش کاریکاتور موزه‌سیندن بیریدیر. ایرانین یئگانه کاریکاتور موزه‌سی اولان بو موزه هم ده دونیانین ایکینجی ان بؤیوک کاریکاتورا موزه‌سیدیر. موزه آذربایجان، بلژیک، فرانسه، ایتالیا، سوریه، تورکیه کیمی اؤلکه‌لرین نوماینده‌‌لری‌نین ایشتیراک ائتدیگی دونیا کاریکاتور موزه‌لری رهبرلری‌نین ایکینجی توپلانتیسینا ائو صاحبلیگی ائدیب.
بورادا دونیانین موختلیف یئرلریندن اولان لاتووسکی، کوزوبورکین، کوراوغلو، کوسوبوکین، کولمئشکینو کیمی دونیانین مشهور کاریکاتوراچیلاری‌نین 60-دان چوخ اثرین نومایش اولوندوغو ایکی گالری وار ایدی. موزه بیر چوخ میللی و بین الخالق فئستیواللارا ائو صاحبلیگی ائدیب. بورادا تخمیناً یوز اؤلکه‌دن ایکی مین اوریژینال صنعت اثری آرخیو ائدیلمیشدیر.
تبریز کاریکاتور موزه‌سی
موزه‌نین آذربایجان اوچون تاریخی اؤنمی
تبریز کاریکاتور موزه‌سی آذربایجانین هر ایکی تایی‌نین کاریکاتور تاریخینی عکس ائتدیرن خوصوصی بیر موزه‌یدی. گونئی و قوزئی آذربایجانین کاریکاتور تاریخینی ایکی حیصّه‌‌‌یه بؤلمک مومکون دئییل. چونکی هر ایکی تایدا کاریکاتورون اساسی «موللا نصرالدین» ژورنالی‌نین نشری ایله قویولوب.
100 ایل اوّل، 1921-جی ایلده «موللا نصرالدین» ژورنالی‌نین باش رئداکتورو جلیل ممدقولوزاده ژورنالی چاپ ائتدیرمک اوچون عایله‌‌‌سی ایله بیرلیکده 3 آی تهلوکه‌‌‌لی یوللاردان کئچه‌رک تبریزه گلیب. تبریز موللالاری‌نین اونا قارشی اؤلوم فتواسی وئرمکلرینه باخمایاراق او، گونئی آذربایجانین ان بؤیوک شهری اولان تبریزه کؤچور و ژورنالینی یئنیدن نشر ائتدیرمه‌یه باشلاییر.
جلیل محمّدقولوزاده 1921-جی ایلده باکیداکی سیاسی-اجتماعی وضعيّته گؤره «موللا نصرالدین» ژورنالینی باکیدا چاپ ائتدیره بیلمه‌دیگی اوچون تبریز شهرینه کؤچور.
«موللا نصرالدین» ژورنالیندان کاریکاتور – روس‌لار حربی تعلیم‌لر کئچیرلر، ایراندا ایسه بیر موللا اینسان‌لارا خورافات اؤیره‌دیر.
قئید ائدک کی، 1920-جی ایلده گونئی آذربایجاندا شیخ محمّد خیابانی حاکیميّته گلمیشدیر. خیابانی ایراندا کونستیتوسییا طرفداری اولان آذربایجانلی لیدئر ایدی و اؤلکه‌ده ایفراط مرکزچیلییه قارشی چیخیردی. جلیل ممدقولوزاده ایله خیابانی آراسیندا یوکسک موناسیبت وار ایدی، چونکی «موللا نصرالدین» ژورنالیندا آزادلیق حرکاتینا دقت آیریلیر و حرکاتین بَیاننامه‌لری ده ژورنالدا چاپ ائدیلیردی. بوندان باشقا جلیل ممدقولیزاده‌نین حیات یولداشی حمیده خانیم خاطیره‌لرینده یازیر کی جلیل‌ین عایله‌‌‌سی ده گونئی‌دن قوزئیه ایشله‌مک اوچون کؤچوبلر.
بیر ایل عرضینده «موللا نصرالدین» ژورنالی‌نین سککیز سایی تبریزده چاپ اولونوب. بو سایلاردا ژورنال تبریزده‌کی آزادلیق حرکاتینا قوشولوب اونو دستکله‌ییب.
