جاهانشير افندييئو
کؤچورن: میلاد بالسینی
«سياسي، سوسيال، اقتصادی ايدئولوگييالار هئچ بير شکيلده فوتبولا قاريشمير، قاريشماماليدير»[۱]. بو فيکري گونوموز فوتبولوندا بير چوخ آناليتيکلر تئز ـ تئز سسلنديريرلر. آرتيق وضعيت او يئره چاتميشدير کي، بو فيکره قارشي اعتيراض عيرقچيليک و يا غئيري ـ هومانيزم ايله برابر توتولور. لاکين مسئله دئييلديیي قدر ساده و يا سطحيديرمي؟ من دوشونورم کي، دئييل. فوتبول اؤزلویونده ائله ايدئولوگييانين بير پارچاسيدير.
يوقوسلاوييا اس‌اف‌آر-ا بوبان يومروغو!
ايسترديم سيزلري اؤلکه‌ميزين ده ايچينده اولدوغو ياخين تاريخي بير پروسئسه آپاريم. مثلا، ۱۹۹۰-جي ايل ماي آيينين ۱۳-و، کورواتييانين موستقيلليک طالعييني حل ائده‌جک مشهور رئفئرئندومدان دوز ۱ ايل اؤنجه. همين گئجه يوقوسلاوييا تاريخينين ان اودلو ـ آلوولو دئربيسي باش توتدو؛ کورواتييانين دينامو زاقرئب کلوبو سئربييانين قيزيل اولدوزونا (Srvena Zvezda FK) قارشي. قيزيل اولدوز کلوبو آديندان دا گؤروندويو کيمي، ۲-جي دونيا موحاريبهسيندن سونرا دؤنمين کومونيست ناظيرلريندن اولان ميترا ميتروويچ طرفيندن قورولموش و سوسياليست کئچميشي اولان فوتبول کلوبو ايدي. ديگر طرفدن ايسه، ۲-جي دونيا موحاريبهسيندن درحال سونرا بوتون زاقرئب مرکزلي فوتبول کلوبلارينین(HAŠK, Građanski, Concordia) فعاليتينه قاداغا گتيريلميشدير. يوقوسلاوييا تورپاقلاري اوغروندا آرتيق باشلايان قيزغين دؤيوشلر مسئله‌لري داها دا آلوولانديريردي. بو قارشيلاشماني تودمان – ميلوسئويج، ميلتچيليک – کومونيزم، کورواتييا – سئربييا ماتچي کيمي گؤرن اينسانلار اولسا دا، مئيداندا ۲ فوتبول کلوبو موباريزه آپاريردي. يوکسک باسقی و آرتان شيددت سببيندن زاقرئبين ماکسيمير ااستاديونونداکي اويون داياندي. قيزيل اولدوز کومانداسي فوتبولچولاري مئيداني ترک ائتمه‌يه باشلاديلار. همين آنلاردا فوتبول مئيدانچاسيندا هئچ واخت گؤرولمه‌ين بير حاديثه باش وئردي. داها سونرادان ميلانا ترانسفئر ائديله‌جک افسانهوي فوتبولچو، کاپيتان زوونيمير بوبان دينامو آزارکئشيني دؤين پوليسه تپيک ووردو.
بير چوخ کوروات ميلتچيسي بوگونه قدر دوشونور کي، بو تپيک ايللردير داوام ائدن کومونيزم ظولمون، گوناهسيز شکيلده اينسانلاري قتله يئتيرن سيستئمه قارشي وورولان ان گؤستريشلي ضربه ايدي. بو حاديثه ۱ ايل سونرا کئچيريله‌جک اولان کورواتييانين موستقيلليک رئفئرئندومونا آرتيق اؤز تؤحفه‌سيني وئرميشدي. سئچيجيلرين ۹۳% سس چوخلوغو ايله موستقيلليک قازاناجاقلاري آن زوونيمير بوبان هر شئيين فرقينده اولاراق بئله بيلديريردی:
«اورادا من اؤز حياتيمي، کاريئرامي، منه گله‌جکده مشهورلوق قازانديراجاق هرشئيي ريسکه آتديم. اجتماعي فيقور اولاراق بونلاري ائتمه‌لي ايديم و بوتون بونلار سادهجه بير مسئله، بير ايدئيا اوچون ائديلدي – تام موستقيل کورواتييا[۲].»
يوخاريدا قئيد ائتديیيم فيکيرله راضيلاشماغا باشلادينيزسا، سيزه ياخشي خبريم وار. هله تزه باشلاييريق. قونو چوخ گئنيش ساحهلي اولدوغوندان بو يازيمدا سيزلرله تاريخي گئديشاتي يوخ، اؤنملي ايدئولوژيک جريانلاري و موهوم دؤنوش نؤقطه‌لري اولان حاديثهلري بؤلوشه‌جه‌یم.
«بير کلوبدان داها آرتيق» اولانلارين حئکايه‌سي…
فرقلي تاريخي کئچميش سببيندن قاريشيق ائتنيک ترکيبه صاحيب اولان ايسپانييا، فوتبولدا ايدئولوگييالارين ان باريز گؤروندويو اؤلکه‌دير. حتي، مرکزي اويونلار شهر آدلاريني دئييل، عومومي جوغرافي رئگيونو بيلديرير؛ اندلوس، کاتالون، باسک دئربيسي و س. بارسئلونا FK مرکزي ايسپان حاکيميتينه قارشي ان بؤيوک موباريزه آپاران کلوبلار سيياهيسيندا ايلک سيرادا گلير. کلوب هر زامان کاتالون موستقيلليیينين و کاستيلليان ظولمونه قارشي موباريزه‌نين ان بؤيوک سيموولو اولموشدور. هله ۱۹۲۶-جي ايلده کلوب فاناتلاري اويون اؤنجه‌سينده ايسپانييا دؤولت مارشینی اوخوماقدان امتناع ائتميشدير. ۱۹۳۶-جي ايلده باش وئرميش ايسپانييا وطنداش موحاريبهسي دؤنمينده بير چوخ فوتبولچو حربي موباريزه‌يه قوشولموشدور[۳]. دؤنمين بارسئلونا پرئزيدئنتي، آسسيو کاتالان و کاتالونييا سوسياليست رئسپوبليکاسينين عضوو ژوسئپ سونيول قاتي مادريد سئمپاتيزاني اولان فرانسيسکو فرانکو قوشونلاري طرفيندن اؤلدورولموشدور. دؤنمين ديکتاتورو فرانسيسکو فرانکو همچنين ۱۹۴۳-جو ايلده باش وئرن و فوتبول تاريخينين ان قارا لکهلريندن اولان ۱۱-۱-ليک رئال مادريد – بارسئلونا اويونونون باش معماريدير. اؤلوم ريسکلري، آچيق تهديدلر ايسه کاتالون کلوبونو قورخوتمور، عکسينه داها چوخ موباريزه‌يه سسله‌ييردی.
ائسپانيول – بارسئلونا ماتچي بعضيلري طرفيندن کاتالون دئربيسي آدلانديريلسا دا، اويون ائله بارسئلونا(شهر) دئربيسيدير. چونکي، ائسپانيول آديندان دا گؤروندويو کيمي ايسپان ميلتچيلري طرفيندن بارسئلونا شهرينده قورولموش کاتالونييا موستقيلليينه قارشي اولان ايدئولوگييايا صاحيب کلوبدور. ۲۰۱۷-جي ايلين ۱ اوکتيابر تاريخينده باش توتموش کاتالونييا موستقيلليک رئفئرئندومو زاماني بير چوخ فوتبولچو سئچکيلرده اجتماعي شکيلده آيريلما لئهينه «هه» دئيه‌جهیيني آچيقلاميشدي. همين گون نوو کامپ ااستاديونوندا کئچيريلن و ۳-۰ بارسئلونانين غلبه‌سي ايله بيتن لاس پالماس ماتچي ايسه باغلي قاپيلار آرخاسيندا اوينانيلميشدير. کوماندانين کاپيتاني و کاتالونييانين هر زامان آيريلماسي طرفداري اولان گئررارد پيقوه[۱] سس وئرمه سونراسيندا گؤز ياشلارينا حاکيم اولا بيلمه‌ميشدير[۴]. پيقوه عئيني زاماندا بيلديرميشدير کي، هر هانسي ژورناليست و يا مئکانيک سياسي دوشونجه‌سيني آچيق شکيلده گؤستره بيليرسه، نييه فوتبولچولار گؤسترمه‌سين؟[۵]. رئفئرئندوم سونراسيندا دؤيولن و حبس ائديلن کاتالون وطنداشلاري سببيندن پيقوه ايسپانييا ميلليسينده‌کي کاريئراسيني بيتيره بيله‌جه‌یيني آچيقلاميشدير[۶]. بير سيرا فوتبول متخصصي دوشونور کي، ايسپانييانين بؤلونمه‌مه‌سينده و واحيد شکيلده قالماسيندا ائل کلاسسيکونون رولو اينانيلماز درجه‌ده بؤيوکدور[۷]. بارسئلونا کلوبونون مشهور سلوقانيندا دئييلديیي کيمي MES QUE UN CLUB، يعني «بير کلوبدان داها آرتيق»!
ايسپانييا فوتبولوندا بير ديگر ماراقلي ايداره ائتمه سيستئمي ايله فرقلنن کلوب آتلئتيک بيلباودور. بئله کي، آتلئتيک بيلباو کلوبوندا اوينايا بيلمک اوچون سادهجه ۱ قايدا کئچرليدير – سيز موطلق شکيلده باسک ميللتينه عاييد اولماليسينيز. کلوبون بوتون اساس، احتياط و جاوانلاردان عبارت هئيتي سادهجه باسک اويونچولاردان عبارتدير. اگر اويونچو باسک اولماديغي حالدا ۱۸ ياشينا قدر بو ائتنيک کيمليیي قبول ائدرسه، يالنيز او زامان کلوبدا چيخيش ائتمه شانسي قازانير. بئله ليميتلي اويونچو سئچيمينه رغمن آتلئتيک بيلباو لاليگا تاريخينده هئچ واخت اساس ليقادان ۲-جي ديويزييايا دوشمه‌ين ۳ کلوبدان بيريدير. بس ديگر ۲ کلوب؟ بلي، دوغرو تخمين ائديرسينيز – رئال مادريد و بارسئلونا. بعضاً ميللي پرينسيپيالليق ترانسفئره ميليونلار خرجله‌ين کلوبلار ايله باشاباش موباريزه آپارماغي مومکون ائدير.
بريتانييادا فوتبول دينين اؤزودور!
فوتبول، ايدئولوگييا و آزارکئشلر دئديک‌ده بريتانييا فوتبولوندان دانيشماماق قباحت اولار. صنايع اينقيلابي‌نين باش وئرديیي دؤورده بوتون اساس فابريک و زاوودلار بريتانييا آداسينين قوزئیینده قورولموشدو. هابئله ايرلاند و شوتلاندلارين ياشاديغي بؤيوک ايشچي شهرلري ده ائله محض قوزئی‌ده يئرلهشيردي. بو جوغرافييادا آنادان اولان هر بير کيشينين سادهجه ۳ فرقلي سئچيم شانسي وار – صنايع، موسيقي و يا فوتبول. ژون لئننون و يا بونو کيمي افسانهوي موسيقي استعدادينيز يوخدورسا بئله، وئن رونی و يا هری کین کيمي بؤيوک فوتبولچو اولا بيلرسينيز. باياق دا قئيد ائتديیيم کيمي، ايشچينين، امکچينين اولدوغو هر يئرده سوسياليزم واردير. ليوئرپول شهري هر زامان «قيرميزي بايراق» ديرهیينين برکيديلديیي ان بؤيوک قالا اولموشدور. ۱۸۹۲-جي ايلده مئرسئي چايينين کنارينداکي کلوب دين فاکتورو سببيندن آيريلدي. شهرين پروتئستانت چوخلوغو ليوئرپول، کاتوليک ايرلاندلاردان عبارت ايداره‌چيلري ايسه ائوئرتون کلوبونو قوردو. بو تاريخدن اعتبارن اوينانيلان مئرسئيسيده دئربيلري هم ده ديني قارشي دورماني فوتبول مئيدانچاسينا داشيييردي. ديگر طرفدن ائوئرتون کلوبو ايداره هئيتينين عضولرينين بير چوخو ليبئراللار، ليوئرپول کلوبوندا ايسه ايشچي پارتيياسي عضولري ايدي. ائوئرتون آزارکئشلرينين ده مشهور بسته‌لرينده دئديکلري کيمي:
«ليوئرپول؛ بئلفاستين باجيسي، چتين، بؤيوک اورکلي، پروتئستانت و بيرليکچي، ليوئرپول[۶].»
شوتلاندييانين کئلتیج فوتبول کلوبو ايسه مودئرن فوتبولدا ان بؤيوک سياسي موباريزه آپاران کلوبلاردان بيريدير. تاريخي ايرلاند کؤکلرينه صاحب اولان کلوب رومان کاتوليکليیي و ايرلاند رئسپوبليکاچيليیينين ان بؤيوک دستکچيلريندندير. کئلتيج کلوبونون ان بؤيوک رقيبي ايسه قاتي پروتئستانت و واحيد بريتانييا ايدئياسينا اينانان گلاسکو رانگئرس کومانداسيدير. کئلتيج فوتبول کلوبونا قارشي سرت و طلبکار وئرگي سيياستينه رغمن، شوتلاندييا دؤولتي گلاسکو رانگئرس کلوبونون چوخ مقداردا وئرگي بورجلاريني سيلميش و اوزون ايللر هئچ نه طلب ائتمه‌ميشدير. ۲۰۱۱-جي ايلده ۲-جي دفعه حاکيميته گلن شوتلاندييا ميللي پارتيياسينين تعقيبلري و طلبلري نتيجه‌سينده کلوبون ۳۰ ميليون فونت بانک بورجو و هله اؤدهنيلمه‌ميش ۲.۸ ميليون فونت وئرگي بورجو اولدوغو آشکار ائديلدي. نتيجه‌ده، ۲۰۱۲-جي ايلده رانگئرس کلوبو اؤلکه‌نين ان آشاغي، ۴-جو ديويزيياسينا ائنديريلمکله جزالانديريلدي. کئلتيج آزارکئشلري ايسه وئريلن بو جزادان سونرا حيسلريني بو شکيلده بيلديريرديلر – «بو هله باشلانغيج دئييل. بو سونون اؤزودو [۹].»
آدينين کؤکونده‌کي «کئلت» سؤزوندن ده گؤروندويو کيمي، کئلتيج کلوبو ايرلاند ميللييتچيليیينين شوتلانديياداکي ان بؤيوک سيموولو ايدي. کلوب آزارکئشلري بير چوخ اويوندا کرال بيرینجی ائدوارين دؤورونده اينگيلتره‌يه قارشي آپاريلان موباريزه‌ده خالقا اؤندرليک ائدن شوتلاند جنگاوري ويليام ولیک شکيللري اولان بنئرلر آچميش و بو سببدن بير چوخ بريتانييا مطبوعاتي طرفيندن تنقيد ائديلميشدير. بوندان علاوه، ايرلاند رئسپوبليکاچي اوردوسو و اؤزلليکله، بوببي سئندسين تئرروريست کيمي يوخ، خالقي و ميلتي اوچون موباريزه آپاران بير قهرمان کيمي قلمه آلينماسيني طلب ائتميشلر. اونلار همچنين دفعهلرله فلسطينه دستکلريني گؤسترميش، قودسون آيريلماز فلسطين تورپاقلاري اولدوغونو بيلديرميشلر. کلوب آزارکئشلرينين ان دقت چکن بسته و کورئوقرافييالارينا بونلار داخيلدير – «مقدس پاسکا گونو کيم دانيشماقدان قورخور؟» ،«موحاريبه بيتدي. عوصيانچيلار قاليبدير»، «سيزين نوه‌لرينيز کئلتيج آزارکئشي اولاجاقلار.»
موسوليني و فوتبول
سياست و ايدمانين بير ـ بيريندن آيري توتولماسي ايدئياسي ایتالیادا ان يومشاق ديلده دئسک، گولونج حساب اولونور. معاصر ايتاليان فوتبولونا ان درين ايزلر قويموش شخصلردن بيري و بيرينجيسي هئچ شوبهه‌سيز، ایتالیا فاشيست پارتيياسينين ليدئري بئنيتو موسولينيدير. بيل مورراي بيلديرير کي، موسوليني ايدمانين ايستيفاده‌سيني حاکيميتين ان اؤنملي سياستلريندن بيري کيمي گؤرن ايلک سياسي ليدئر ايدي[۱۰]. استالين و ساوئت ياي اوليمپيادا اوغورلاريندان تبليغات ماشيني اولاراق ايستيفاده ائتديیي کيمي، موسوليني و صاحيبي اولدوغو مئديا قوروملاري ایتالیانين فوتبول اوزره دونيا چئمپيوناتينداکي اوغورلاردان پوپوليارليق قازانيردي. ایتالیا تاريخينده ان چوخ فوتبول ااستاديونو دا ائله محض موسوليني دؤنمينده تیکیلميشدير. گئنوا، اينتئر و ميلان کيمي کلوبلارين ان تئز زاماندا «ايتاليانلاشماسيني» طلب ائدن موسوليني، هابئله شخصي گؤستريشي ايله ۱۹۲۷-جي ايلده روما فوتبول کلوبونو ياراتميشدير. اساس مقصدلردن بيري ده مرکزي روما شهرينده‌کي ان قديم کلوب اولان لاتسيونو نوفوذان سالماق و شهرين يئني فوتبول ليدئري اولماق ايدي. روما لاتسيو ماتچلارينين بو قدر حرارتلي کئچمه‌سينه و رومانين ایتالیاداکي ان چوخ نيفرت ائديلن کلوب اولماسي رئالليغينا تعجوب ائتمه‌مک گرک.
۱۹۳۴-جو ايلده باش وئرميش دونيا چئمپيوناتي ايسه بير چوخ شخصده جدي سوال ايشاره‌لري دوغورموشدور.۱/۴ فينال زاماني ايسپانيا ايله اويوندا ایتالیانلار ۳ ايسپان فوتبولچوسونو زدهلهسه ده، حاکيم طرفيندن جزالانديريلماديلار. ياريم فينالداکي آوسترييا ماتچيندان ۱ گئجه اؤنجه ايسه اويونون باش حاکيمي ايوان ائکليند ايله موسوليني بيرليکده ناهار ائتديکلري تصادوف دئييلدي[۱۱]. گيوسئپه مئازا، لويس مونتي و رايموندو اورسي کيمي افسانهوي فوتبولچولارين هئيتينده اولماسينا رغمن، آزورينين تاريخينده‌کي ايلک چئمپيونلوغونا آرتيق کؤلگه دوشورولموشدو. بولونيا فوتبول کلوبو تاريخينده‌کي۶ چئمپيونلوغون ۴-و موسولينينين حاکيميتده اولدوغو دؤورده قازانميشدير. بلي. موسوليني هانسي کلوب آزارکئشي اولدوغونو ايسه دوغرو تخمين ائتمک چتين اولمامالي‌دير.
«هاراي هاراي من تورکم»
«يئل ياتار، توفان ياتار، ياتماز تيراختور بايراغي». آراز چايينين او تاييندا قلبي دايم ايستيقلاليت روحو ايله چيرپينان فوتبول کلوبونون حئکايه‌سي.
۱۹۷۰-جي ايلده مرکزي تبريز شهرينده يئرلشن ايران تراکتور قاييرما شيرکتينين دستهیي ايله تراکتورسازي فوتبول کلوبو فعاليته باشلاميشدير. ۸۵ مين آزارکئش توتومو اولان مرکزي ايمام ياديگار(سهند) ااستاديونونا گلن مينلرله تورک فوتبول سئور يالنيزجا کوماندالاريني دستکله‌مک اوچون دئييل، هم ده واحيد رئژيمه و سيستئمه قارشي اولان دوشونجه‌لريني اجتماعی شکيلده بيلديرمک اوچون اورادا توپلاشيرلار. گونئي آذربايجانداکي تراکتور اويونلاري جمعه نامازي قدر اؤنملي سوسيال بير مسئوليتدير.
کلوب هابئله، ايراندا ااستاديونا بوراخيلمايان قادين حاقلاري اوچون جدي موباريزه و ديره‌نيش گؤسترميشدير. قادين آزارکئشلر ايسه استاديون اطرافينداکي تپه‌لرين اوزرينه چيخاراق اويونو تاماشا ائديرلر[۱۲]. قول وورولدوغو زامان فوتبولچونون آديني تکرارلايان «قيرميزي قوردلار»، قول بوراخيلان زامان ايسه تک آغيزدان «عئيبي يوخ!» قيشقيريرلار. «ياشاسين آذربايجان!»، «آذربايجان وار اولسون، ايستهمه‌ين کور اولسون!»، «آذربايجان يوردوموز، تيراختور بوز قوردوموز!»، «تورک ديلينده مدرسه، اولماليدير هر کسه!» و س. کيمي شعارلار سسلنديرديیي اوچون بير نئچه آزارکئش پوليس طرفيندن حبس ائديليب، کلوب ايسه اويونلاريني تاماشاچيسيز استاديوندا کئچيرمه‌لي اولوب. آزارکئشلر آذربايجاندا باش وئرن حاديثهلره ده بيگانه قالماميش، دفعهلرله خوجالي، قاراباغ، تورک ديلي کيمي مسئله‌لرده اويونلارا بنرلر گتيرميش و شعارلار سسلنديرميشديرلر.
هله ده، «او نه اويوندور سن آللاه؟ ۲۲ کيشي ده بير توپون آرخاسيجا قاچار؟» و يا «فوتبول ايزله‌ين کيشيلري جدييه آلميرام» کيمي فيکيرلرين گوندهمده اولدوغو دؤورده مسئله‌لره بير آز «قوتودان چؤله» باخماغينيزي ايسته‌ديم. ایستوا بخارست کلوبونون رسمي صاحبي رومينييا مودافيعه ناظيرلييیدير. يونانيستانين پاوک و آئک کلوبلاري ايستانبولدا قورولموش، لاکين موحاريبه نتيجه‌سينده سئلانيک و آفينايا کؤچمه‌يه مجبور قالميش قاچقين کلوبلاريدير. ايرلاندييانين دئرري کيتي آزارکئشلرينين اعتراضلاري سببيندن شهرين آدي دييشديريله‌رک لوندوندئرري قويولموشدور. يوخ، دوغرودور، فوتبول اينسانلار اوچون اؤلوم ـ قاليم مسئلهسي دئييل. فوتبول هر ايکي مسئله‌دن داها واجب بير مسئله‌دير.
قایناق‌لار:
[1] The Daily Star (2018). Don’t mix politics and football: Petkovic. Available:
https://www.thedailystar.net/fifa-world-cup-2018/dont-mix-politics-and-football-petkovic-1594132
[2] Matt Gault (2015). ZVONIMIR BOBAN AND THE KICK THAT STARTED A WAR. Available:
https://thesefootballtimes.co/2015/09/28/zvonimir-boban-and-the-kick-that-started-a-war/
[3] Ashay Kapse (2018). Don’t mix politics and football: Petkovic. Available:
Ideologies At War: Deconstructing The Essence Of The Football Club
[4] The Daily Star (2016). Ideologies At War: Deconstructing The Essence Of The Football Club. Available:
https://www.dailystar.co.uk/news/world-news/649053/Catalonia-referendum-Barcelona-defender-Gerard-Pique-cries-Las-Palmas-game-Nou-Camp
[5] Sid Lowe (2017).The Guardian. Available:
https://www.theguardian.com/football/2017/oct/04/gerard-pique-catalan-referendum-footballer-express-himself
[6] Barcelona Press Association (2017). The Guardian. Available:
https://www.theguardian.com/football/2017/oct/01/barcelona-gerard-pique-catalan-independence
[7] – Rookwood, Dan. “The bitterest rivalry in world football.” The Guardian. 28 August 2002. Online.
[8] Dan Jackson (2017). ‘Friends of the Union’: Liverpool,
Ulster, and Home Rule, 1910 – 1914. Available:
https://www.hslc.org.uk/wp-content/uploads/2017/10/152-7-Jackson.pdf
[9] Graham Spiers (2015). How the mighty Glasgow Rangers have fallen. Available:
https://www.theguardian.com/football/2015/jan/18/how-the-mighty-glasgow-rangers-have-fallen
[10] – Bill Murray, The World’s Game: A History of Soccer (Chicago: University of Illinois Press, 1996), 65.
[11] Greg Lea (2015). THE RELATIONSHIP BETWEEN MUSSOLINI AND CALCIO. Available:
https://thesefootballtimes.co/2015/07/20/the-relationship-between-mussolini-and-calcio/
[12] – زنان و کودکان تماشاگران ویژه تراکتورسازی و پرسپولیس تاریخ : 27 فروردین 1389 ، خبر آنلاین
https://www.khabaronline.ir/news/55215/%D8%B2%D9%86%D8%A7%D9%86-%D9%88-%DA%A9%D9%88%D8%AF%DA%A9%D8%A7%D9%86-%D8%AA%D9%85%D8%A7%D8%B4%D8%A7%DA%AF%D8%B1%D8%A7%D9%86-%D9%88%DB%8C%DA%98%D9%87-%D8%AA%D8%B1%D8%A7%DA%A9%D8%AA%D9%88%D8%B1%D8%B3%D8%A7%D8%B2%DB%8C-%D9%88-%D9%BE%D8%B1%D8%B3%D9%BE%D9%88%D9%84%DB%8C%D8%B3
