ایللردیر آذربایجانین اؤنملی یوللاریندان اولان، ماراغا-هشترود یولونون آزادراه اولما لاییحه‌‌سی‌نین تاماملانماسی گؤزله‌نیلرکن، هر ایل یول قضاسی نتیجه‌سینده اونلارلا اینسان اؤلور و یارالانیر.
ایندیکی ماراغا – هشترود یولو اؤلکه‌نین شمال‌غربینده ان چوخ یول قضاسی‌نین باش وئردیگی یوللاردان بیریدیر. بو یولون ائنینین آز اولماسی، کسکین دؤنگه‌لری، ائنیش و یوخوشلاری گونده‌لیک ۷۰۰۰ ماشین‌ین حرکتی اوچون اویغون دئییل. بوندان باشقا بو یول شمال غرب ایالتلری‌نین ۳ میلیونلوق اهالیسی‌نین ان اؤنملی نقليات واسطه‌‌‌سیدیر. «اؤلوم یولو» آدلاندیریلان بو یولدا، ال‌وئریشسیز شرایط سببیندن هر ایل بیر چوخ سرنیشین و وطنداش حیاتینی ایتیریر. سون اوچ ایلده بو یولدا از آزی ۱۳۵ نفرین یول قضاسی نتیجه‌سینده اؤز حیاتینی ایتیریب.
ماراغا-هشترود یولوندا چوخلو سایدا یول قضاسی حادثه‌‌‌لری بو لاییحه‌‌نین باشا چاتدیریلماسینی آذربایجان ساکینلری‌نین اساس قایغیلاریندان بیرینه چئویریب. ماراغا- هشترود آزاد راه تیکینتیسی لاییحه‌‌سینی باشا چاتدیرماق اوچون ۱.۸۰۰ میلیارد بودجه گرکدیر. لاکین تهراندان لازیمی بودجه‌نی آلماق هله ده مومکون اولماییب.
دیگر طرفدن، بو یولون تاماملانماسی آذربایجان شهرلری‌نین اقتصادی اینکیشافینا دا سبب اولا بیر. یعنی بو لاییحه‌‌نین تاماملانماسی یول قضاسی‌نین آزالماسی ایله یاناشی آذربایجان بؤلگه‌لری‌نین اینکیشافینا، داها چوخ سرمایه قویان اینسانلارین بؤلگه‌یه گلمه‌سینه سبب اولا بیلر. بو دا آذربایجان بؤلگه‌لری‌نین ان اؤنملی احتیاجلاریندان بیریدیر.
بو آزاد راه‌ین چکیلیشی زامانی اطراف تورپاقلار رایون اهالیسی‌نین بیر قیسمی طرفیندن هئچ بیر اؤده‌نیش ائدیلمه‌دن دؤولته تحویل وئریلیب. آزاد راه‌ین تیکینتیسینه باشلایاندان بیر نئچه ایل سونرا حؤکومت بعضی ساکینلرین ده تورپاغینی مصادیره ائدیب و عوضینده اونلارا هئچ نه اؤده‌مه‌ییب.
آرتیرمالیییق کی، بئش مرحله‌‌‌ده ایجرا اولوناجاق، ۱۱۰ کیلومتره اوزونلوغوندا اولان ماراغا-هشترود آزاد راه لاییحه‌‌سی‌نین ایجراسینا ۱۳۹۲-جی ایلده باشلانیلیب. آچیقلانان تقویمه گؤره، یول ۱۳۹۸-جی ایلده حاضر اولمالی ایدی. آما بو لاییحه هله ده تاماملانماییب. بونون دا ان اساس سببی تهرانین لازیمی بودجه‌نی تعمین ائتمه‌مه‌سیدیر. بو دا هر ایل اونلارلا اینسانین اؤلومو و یارالانماسی ایله نتیجه‌له‌نیر.
