چئویرن: اسماعیل زیناللی
دؤولت – بئشینجی کيتاب. سوقرات و آدئيمانتوسون ديالوقوندان بير حيصه :
سوقرات: – بيز بو اينسانلارين اؤلرکن هئسيودون دئديگي کيمي “تورپاغين آلتيندا موقدس بير وارليق اولاراق مسکن ساليب اينسانلاری بلادان قوروياجاقلار” سؤزونه اينانماياجاغيقمی؟
آدئيمانتوس: – التته کی، ايناناجاغيق.
س: – داها سونرا آپولوندان بو اينساندان داها اوستون ايلاهي وارليقلاری نئجه دفن ائتمه‌لي اولدوغوموزو سوروشاجاغيق و نه ائده‌جه‌یيکسه، اونون جاوابينا اويغون اولاجاق.
آ: – باشقا نئجه ائتمک اولار کي؟
س: – داها سونرا ايسه اونلارين قبيرلرينه باخاجاغيق و بو ايلاهي روحلارا سيتاييش ائده‌جه‌یيک. و عئيني ديقتي ياشاديغي مودتده ياخشي بيري کيمي تانينيب قوجاليقدان اؤز اجلي ايله اؤلنلره ده گؤستره‌جه‌یيک.
آ: – سؤزسوز کي، بو دا چوخ دوغرو اولاجاق.
س: – بس بيزيم عسگرلريميز دوشمنلرينه قارشي نئجه داورانمالي اولاجاقلار؟
آ: – نه معنادا؟
س: – ايلک نؤوبه‌ده مغلوب اولانلارين کؤللشديريلمه‌سيني دوشونک. سنجه يونان شهرلرينين بير-بيريني قول ائتمه‌سي نه قدر دوغرودور؟ هم ده ياد ائلليلرين الينده قول اولما تهلوکه‌سيني گؤردويوموز اوچون بونون ديگر دؤولتلر طرفيندن ده باش وئرمه‌سينين قارشيسيني آلماق و يونانلارا احتيرام گؤستريلمه‌سي اوچون چاليشماق لازيمدير.
آ: – تام اولاراق ان دوغروسو يونان خالقيني قوروماقدير.
س: – بئله‌ليکله يونانلاري قول ائتميه‌جه‌یيک و بونون دوغرو اولدوغونو ديگر يونان دؤولتلرينه ده اؤيرده‌جه‌یيک.
آ: – منجه ده آرتيق بئله اولدوقدان سونرا اونلار بير-بيرلريندن ال چکيب ياد ائلليلره قارشي دؤيوشمه‌يه باشلاياجاقلار.
س: – بس غلبه‌لردن سونرا دوشمن دؤيوشچولري سويماق، ميثال اوچون سيلاحلاريني آلماق سنجه ياخشي بير شئيدير؟ بو اؤنملي بير ايش گؤرورموش کيمي اؤلولرين اطرافيندا کئشيک چکن قورخاقلاري اوجالتماق، اونلارا آوانس (ایمتیاز) وئرمک اولاردي. دوشمنلري بئله سويماق اوردولاريميزي برباد بير حالا گتيرر.
آ: – دوغرودور.
س: – سنجه ده اؤلن آدامي غارت ائتمک بيعابيرچي درجه‌ده بير آج‌گؤزلوک دئييلمي، اؤلموش دوشمنه قارشي بئله ائتمک جيليزليق و آروادخاصيتلي‌ليک دئييلمي؟ آرتيق قارشيسينداکي اونون دوشمني يوخ، دؤيوشدويو شخصين جسديدير، اؤلدوکدن سونرا دوشمني سمايا قالخميشدير. بونونلا اونا داش آتانا يوخ، داشا جومان ايتلرين ائتديگي آراسيندا نئجه بير فرق واردير؟
آ: – البته کي، فرق يوخدور.
س: – بئله‌ليکله اؤلولري قارت ائتمه‌يه‌جک و دوشمنلره جسدلريني آپارماغا ايجازه وئره‌جه‌یيک.
آ: – دوز اولان دا ائله بودور.
س: – آلديغيميز سيلاحلاري گؤتوروب معبدلردن آسماياجاغيق و اگر ديگر يونانلارلا دوستجاسينا موناسيبت ساخلاماق ايسته‌ييريکسه، خوصوصيله ده يونانلارين سيلاحلارينا قارشي بونو ائتمه‌يه‌جه‌یيک. بورادا ياخينلاريميزدان بيرينين ده سيلاحي اولا بيله‌جه‌یينه گؤره چاليشاجاغيق کي، گوناها گيرمه‌يک آما تانري عکسيني ايسته‌سه باشقا مسئله.
آ: – حاقليسان.
س: – يونانلارين ائولريني يانديرماق، تورپاقلاريني تالان ائتمک مسئله‌سينده عسگرلريميز نئجه داورانماليدير سنجه؟
آ: – ياخشي اولاردي کي، سن دئيه‌سن بيز دينله‌يک.
س: – من دوشونورم کي، بونلارين هئچ بيريني ائتمه‌لي دئييللر. ساده‌جه ايلليک محصولو گؤتورمکله، کيفايتلنسه‌لر ياخشي اولار. ايجازه وئر، سببيني دئييم؟
آ: – بويور.
س: – موناقيشه و موحاريبه دئيه ايکي سؤز اولدوغو کيمي اينسانلار آراسيندا دا ايکي جور ايختيلاف وار: بيري ياخينلار و قوهوملاريميزلا اولان، ديگري ايسه يادئلليلرله اولان ساييلا بيلر. ياخين بيلديکلريميزله اولانا موناقيشه، ياد ائلليلرله اولانا ايسه موحاريبه دئيه‌جه‌یيک.
آ: – دوغرو فيکيردير.
س: – ياخينلار و قوهوملار دئديکلريميز عئيني سويدان اولان يونانلار، ياد ائللي دئديکلريميز ايسه باربارلار ساييلا بيلرلر.
آ: – البتته!
س: – اگر يونانلارلا باربارلار دؤيوشرلرس، بونا موحاريبهدئيه‌جگيک، چونکي بونلار طبيعي دوشمنديرلر و بير-بيرلرينه نيفرت ائديرلر. يوخ اگر يونانلار آراسيندا ايختيلاف اولارسا، دئمه‌لي اؤلکه‌ده ايکييه بؤلونمه، چاتيشمازليق وار چونکي بوتون يونانلار اصلينده بير-بيرلرينه ياخينديرلار. بو ايختيلافلارا ايسه موناقيشه دئيه‌جه‌یيک.
آ: – من ده تام اولاراق عئيني دوشونورم بو مؤوضوعدا.
س: – ايندي اؤلکه‌ده بؤلونمه اولاندا، موناقيشه‌لر باشلاياندا هر بؤلونن طرف بير-بيرينين تورپاقلاريني تالان ائتسه، ائويني يانديرسا، سوندا نئجه بير وضعيت اولاجاغيني دوشون. بو طرفلرين هئچ بيرينده اصل وطن سئوگيسي يوخدور. اولسايدي اونلاري بسله‌ين آنالارينا قارشي بئله اؤزباشيناليقلارين اولماسينا دؤزه بيلمزديلر. آنجاق عاغيللي و منطيقلي اولان ايسه بودور کي، غلبه قازانانلار سوندا باريشيق الده ائده‌جکلريني بيلديکلرينه گؤره مغلوبلارين يالنيز ايلليک محصولونو گؤتورسونلر.
آ: – بو فيکير ديگرلريندن داها آز قدار سسله‌نير.
س: – قوراجاغيميز دؤولت يونان دؤولتي اولماياجاقمي؟
آ: – سؤزسوز کي، يونان دؤولت اولاجاق.
س: – يونانلاري سئويب، بوتون يونانلارا اؤزلري کيمي، بوتون يونانيستانا اؤز تورپاقلاري کيمي باخماياجاقلارمي؟ موقدس يئرلري بوتون يونانلارا عاييد اولاراق گؤرمه‌يه‌جکلرمي؟
آ: – بو جور گؤرمه‌ليديرلر!
س: – و آرالاريندا ايختيلاف اولارسا، بونا موحاريبه يوخ، موناقيشه دئيه‌جه‌یيک.
آ: – بلي.
س: – بئله‌ليکله ده ايختيلاف اولدوقدا دا بير-بيرلري ايله باريشاجاقلاري گونو نظره آليب موناقيشه‌يه گيره‌جکلر. چاليشاجاقلار باريشسينلار. کؤله ائتمه‌يه، محو ائتمه‌يه جهد گؤسترمه‌يه‌جکلر، چونکي اونلاري دوشمنلري کيمي يوخ، دوغرونو گؤسترمک ايسته‌ديکلري ياخينلاري اولاراق گؤره‌جکلر.
آ: – چوخ گؤزل اولاردي.
س: – يونان اولدوقلاري اوچون يونانلاري غارت ائتمه‌يه‌جک، ائولريني يانديرماياجاقلار. بير اؤلکه‌نين بوتون قادين، اوشاق و کيشيلريني يوخ، ساده‌جه کيچيک بير حيصه‌ني تشکيل ائدن، موناقيشه‌يه سبب اولان آرا وورانلاري جزالانديراجاقلار. اکثرن دوستلارينين مسکونلاشديغي تورپاقلارا، ائولره زيان وئرمه‌يه‌جکلر و بو موناقيشه‌يه گوناهکارلار جزالاناندان، گوناهسيزلار قيصاص آلاندان سونرا بيردفعه‌ليک سون وئريله‌جک.
آ: – منجه ده وطنداشلاريميز يونانلارا قارشي بئله داورانماليديرلار. حال-حاضيردا بير-بيرلرينه قارشي ائتديکلريني ياد ائللي باربارلارا قارشي ائتمه‌ليديرلر.
س: – ائله‌ديرسه، عسگرلريميزين يونان تورپاقلاريني تالان ائتمک و ائولريني يانديرماق قاداغاسيني دا قانونلاريميزا علاوه ائده‌جه‌یيک.
آذربایجان تورکجه‌سینین قایناغی: www.milliyyet.info
