آبانین ۱۹-دا آچیلیش مراسیمی کئچیریلن باکی بئین‌الخالق قیسا فیلم‌لر فئستیوالیندا گونئیلی رئژیسسورلار و کینوماتوقرافچی‌لار دا ایشتیراک ائدیبلر. دونیا آذربایجانلی‌لاری اوچون نظرده توتولان «دیلی بیزیم» بؤلمه‌سینده گونئی آذربایجانلی رئژیسسورلار طرفیندن چکیلمیش ۵ فیلم آبانین ۲۱-ده نوماییش ائتدیریله‌جک.
بو ایل باکی بئین‌الخالق قیسا فیلم‌لر فئستیوالینا آلمان، فرانسه، اسپانیا، تورکیه، بلژیک، نوروژ، سوئد، یونان، لوکزامبورگ، اوکراین، مصر، ایران، قزاقستان، قرقیزستان، چین، جنوبی کره و بیر چوخ باشقا اؤلکه‌لردن گلمیش ۷۰۴فیلم قاتیلیب. سئچیم کومیسیونون قرارینا اساساً ۴۲فیلم فئستیوالین بئین‌الخالق، ۲۶فیلم ایسه یئرلی موسابیقه‌سینده ایشتیراک حقوقو قازانیب. بو فیلم‌لر فئستیوالین اساس موکافاتی اولان “قیزیل نار” اوغروندا یاریشاجاقلار.
دونیا آذربایجانلی‌لارینین آنا دیللرینده چکدیکلری فیلم‌لر اوچون نظرده توتولموش «دیلی بیزیم» بؤلمه‌سینده گونئی آذربایجاندا چکیلمیش «بوغاناق»، «چرچی»، «دون»، «قورد» و «منیم پاییم» آدلی قیسا فیلم‌لر نوماییش اولوناجاق.
۱۴–جو باکی بئین‌الخالق قیسا فیلم‌لر فئستیوالی
۲۰۰۴-جو ایلده گنج کینوماتوقرافچی‌لار مرکزی طرفیندن تاسیس ائدیلمیش باکی بئین‌الخالق قیسا فیلم‌لر فئستیوالی بو ایل ده طنطنه‌لی شکیلده حیاتا کئچیریلیر. بو فئستیوال، “کن”، “ونیز”، بئرلین فیلم فئستیوال‌لاری و “اسکار” کیمی موهوم تدبیرلرده موکافات قازانمیش فیلم‌لری نوماییش مکانینا چئویرمیشدیر.
هر ایل دونیانین موختلیف اؤلکه‌لریندن گؤندریلن ۱۵۰۰-دن چوخ فیلمدن ان ماراقلی اولانلاری سئچیله‌رک فئستیوالین پروقرامینا داخیل ائدیلیر. بو فئستیوال، یئرلی و خاریجی رئژیسسورلارین، پرودوسئرلرین، سسئناریست‌لرین گؤروش مکانی اولاراق اهمیت کسب ائدیر.
باکی بئین‌الخالق قیسا فیلم‌لر فئستیوالی، یئرلی رئژیسسورلارین فرقلی یاناشما اوسلوب‌لارینی و ماراقلی حادیثه‌لری تاماشاچی‌لارا تقدیم ائتمک مقصدیله یئنی فیلم‌لرینی آلتی گون بویونجا نوماییش ائتدیریر.
فئستیوال، آذربایجاندا کینئماتوقرافین تمل‌لریندن اولان قیسا فیلم‌لره ماراغین آرتیریلماسی، گنج کینئماتوقرافچی‌لارین تشویق ائدیلمه‌سی و دسته‌ییله دقتی جلب ائدیر. اون دؤرد ایل عرضینده رئاللاشان بو فئستیوال، دونیا و اؤلکه‌ده باش وئرن مدنی، سیاسی و سوسیال حادیثه‌لری، موختلیف کاراکتئرلری بیرلشدیرن رنگارنگ فیلم‌لری نوماییش ائتدیریر.
فیلم‌لر و موسابیقه پروقرام‌لاری
بو ایل فئستیوالا ۷۸اؤلکه‌دن ۷۰۴فیلم قاتیلیب. موسابیقه‌یه تقدیم ائدیلن فیلم‌لردن ۴۲-ی بئین‌الخالق، ۲۶-ی ایسه یئرلی موسابیقه‌ده ایشتیراک حقوقو قازانیب. بو فیلم‌لر “قیزیل نار” موکافاتی اوچون یاریشاجاقلار. عینی زاماندا فئستیوالین ایچینده موختلیف پروقرام‌لار دا یئرلشدیریلیب. بونلاردان “آسیا ایستعدادلاری” و “سینه‌موبیل”(موبایل تئلئفونلا چکیلن فیلم‌لرین موسابیقه‌سی) موسابیقه پروقرام‌لارینی سایماق اولار. “آسیا ایستعدادلاری” پروقرامیندا آسییا اؤلکه‌لرینین بدیعی ۱۷فیلمی و “سینه‌موبیل” پروقرامیندا ۳فیلم نوماییشه قویولاجاق. “پانوراما” پروقرامیندا ایسه، گله‌جه‌یه بؤیوک اومیدلرله باخان مؤلیف‌لرین فیلم‌لری تقدیم اولوناجاق.
دیگر اهمیتلی پروقرام‌لاردان بیری ده “دیلی بیزیم” پروقرامیدیر. بو پروقرامدا دونیادا یاشایان آذربایجانلی‌لارین آذربایجان دیلینده چکدیکلری فیلم‌لر ایشتیراک ائدیر. باکی بئین‌الخالق قیسا فیلم‌لر فئستیوالی‌نین دیرئکتورو فهروز شامییئو، فئستیوالین پروقرامی حاقیندا “Kult.az” سایتینا دانیشارکن بیر چوخ مقام‌لارا دقت چکیب. شامییئو فئستیوالدا “دیلی بیزیم” آدلی پروقرامین یارادیلماسی‌نین گونئی آذربایجانلی کینئماتوقرافچی‌لارین آنا دیلینده چکدیکلری فیلم‌لرین بؤیوک ماراغی سببی ایله اولدوغونو وورغولایاراق، بو بؤلمه‌نین یارادیلماسیندا گونئیلی رئژیسسور رضا صیامی‌نین امه‌یی‌نین بؤیوک رول اوینادیغینی قئید ائدیب.
او هم ده “دیلی بیزیم” پروقرامی‌نین تاماشاچی‌لار طرفیندن بؤیوک ماراقلا قارشیلاندیغینی و بو بؤلمه‌ده آذربایجان دیلینده چکیلمه‌یه باشلانان فیلم‌لر حاقیندا ماراقلی دیسکوسسییالارین کئچیریلدیگینی بیلدیره‌رک، فئستیوالین بو ایلکی “دیلی بیزیم” پروقرامی‌نین داها دا گئنیشلنمه‌سی اوچون پلان‌لارینین اولدوغونو وورغولاییب.
آبانین ۲۱-ده نیظامی کینو مرکزی‌نین ۳-جو سالونوندا ساعت ۱۷:۰۰دا (تبریز واختی ایله)-گونئیدن نوماییش ائتدیریله‌جک قیسا فیلم‌لر بونلاردان عبارتدیر:
۱. قورد / رئژیسسور: بهروز شمشیری / بدیعی / دیلی بیزیم
۲. منیم پاییم / رئژیسسور: امین باحجب / سندلی / دیلی بیزیم
۳. بوغاناق / رئژیسسور: ایبراهیم جوادخانی / بدیعی / دیلی بیزیم
۴. چرچی / رئژیسسور: مهدی بهزادپور / بدیعی / دیلی بیزیم
۵. دون / رئژیسسور: حامد موسوی حسینی / بدیعی / دیلی بیزیم
