سوسيولوژی، لاتينجادا جمعيت آنلامينا گلن سوسیوس Socius و يونانجادا معلومات آنلامينا گلن لوگوس’دان Logos تشکيل اولونوب. کلمه آنلامی سوسيال بيلگی دئمکدير و عوموميتله جمعيتی آراشديرير.
سوسيولوژی؛ سوسيال قروپلاری، قوروملاری، تشکيلاتلاری و تشکيلاتلارآراسي علاقه‌لری، حاديثه‌لری، سوسيال علاقه‌لري، دييشيک‌ليکلري و اينکيشاف پروسئس‌لرينين سبب-نتيجه‌سيني تدقيق ائتمک اوچون علمي مئتودلاردان ايستيفاده ائدن سوسيال علمدير. سوسيولوژی جمعيتين عومومي قانونلاريني، سوسيال داورانيش طرزلريني اؤيرنمه‌يه چاليشير. سوسيولوژی جمعيتي بير بوتؤو اولاراق آراشديرير.
سوسيولوژی بير علم کيمی يارانارکن، 16-جی عصردن بري اينکيشاف ائدن طبيعت علملريندن و فلسفي دوشونجه‌دن، 18-جی عصرده ايسه صنايع اينقيلابيندان و 1789-جو ايلده فرانسا اينقيلابيندان تاثيرلنميشدير. صنايع اينقيلابی و 1789 فرانسا اينقيلابی داها تاثيرلي اولموشلار. صنايع اينقيلابی ايله آوروپادا درين، کؤکلو و سورعتلي سوسيال و ايقتيصادی دييشيکليکلر مئيدانا گلدی. شهرلر و فهله صينفي اورتايا چيخدي. فرانسيز اينقيلابي آوروپانين سياسي و سوسيال ایستروکتورونا(قورولوشونا) بؤيوک تاثير گؤستردي. صنايع اينقيلابيندان سونرا اورتايا چيخان سوسيال بؤحران فرانسا اينقيلابيندان سونرا داها دا آرتدي و بو دا جمعيتين آراشديريلماسيني طلب ائتدي. بوندان باشقا، اينتئللئکتوال عاليملرين وارليغي و دوشونجه‌نين آزاد موحيطي سوسيولوژی‌نین دوغولماسينا تاثير گؤستردی. سوسيولوژی‌نین دوغولماسيندا تاثيري اولان عاليملر، آقوست کنت، ائمیل دورکهايم، لئ پلي، کارل مارکس و ماکس وئبئردير. سوسيولوژی‌نین تاسيسچي‌سي آقوست کنتدور. ائميل دورکهايم ايسه سوسيولوژی‌نین مؤوضوعسونو و اوصولونو (مئتودونو) موعين ائده‌رک سوسيولوژی‌نین بير ديسيپلين کيمی قورولماسيندا تاثيرلي اولدو.
آنجاق سوسيولوژی مئتودو يوزلرله ايل اول ده ايستيفاده ائديلميشدی. ابن خلدون (1332-1406) موقدیمه آدلي کيتابيندا يئني بير علم ياراتماق ايسته‌ديگيني و بوندا اوغورلو اولدوغونو ايفاده ائدير. او، بو علمه “مدنيت” آديني وئردي. بو يئني علمين اينجه‌له‌يه‌جه‌یی مؤوضوعلار ايجتيماعي حيات و تشکيلاتلاردير.
سوسيولوژی فردي پروبلئملرله مشغول اولماز، چونکي اونون مؤوضوعسو سوسيال حاديثه‌لر و فاکتلاردير. سوسيال حاديثه‌لرين و فاکتلارين اورتاق نؤقطه‌لريندن حرکت ائده‌رک عومومي مؤوضوعلارا چاتير. ايجتيماعي حاديثه‌لرين چوخ‌طرفلي و چوخ‌فاکتورلو بير شکيلده اله آلاراق سبب-نتيجه علاقه‌لرينی آراشديرير. سوسيولوژی ايجتيماعی حاديثه‌لری، عومومی فاکتلاری و جمعيتی بوتؤولوکده آناليز ائدير. او، لازيم اولاني دئييل، مؤوجود اولاني اولدوغو کيمي آراشديرير. يعني طرفسيز اولماغا چاليشير.
سوسيولوژی‌نین جمعيتين نئجه دييشديگيني، تاريخي اولاراق نئجه اينکيشاف ائتديگينی و بو پروسئسلرينی اينجله‌ين علمدير. سوسيولوژی‌نین بيزه قازانديرديغي بيلگي سايه‌سينده جمعيتده گؤرونه‌نين آرخاسينداکينی گؤروب آنلاييب و شرح ائديريک. هابئله، سوسيولوژی ايله جمعيت ايچينده بيلسک ده بيلمه‌سه‌ک ده سوسيال روللاريميزي و ایستاتولاريميزی اؤيره‌نيريک.
سوسيولوژی جمعيتلرين عئيني اولماديغيني بيلديگی اوچون بوتون جمعيتلره تطبيق ائده‌جک اونيوئرسال پرينسيپلر موعين ائتمز. ان ياخشي جمعيت مودئلينی (ايدئال جمعيت و يا اوتوپييا) اورتايا قويماق ايسته‌مز. چونکي سوسيولوژی نورماتيو (قايدا قويوجو) بير علم دئييلدير. يعني سوسيولوژی جمعيتي و جمعيت ايچينده‌کی علاقه‌لری اوبيئکتيو و علمي اولاراق تدقيق ائدن پوزيتيو بير علمدير. تنقيدی دوشونجه‌نين ده معياري اولان اوبيئکتيوليک، سوسيولوقون دويغو-دوشونجه و تصوراتيني کنارا بوراخماسي دئمکدير.
ايلک سوسيولوقلار ياشاديقلاري جمعيتلرين معنالي بير وارليق اولدوغونو اورتايا قويماق ايسته‌ييرديلر. اونلار اؤز جمعيت‌لرينين و او زامانکي حاديثه‌لرينی شرح ائتمکدن باشقا چوخ شئيلر ده ايسته‌ييرديلر. داها دا اؤنمليسي، سوسيال دونيانين اينجلنمه‌سينده عوموميتله جمعيتين نئجه ايشله‌ديگيني ايضاح ائده بيله‌جک يوللاري آراشديرديلار. بونا باخماياراق، دورکهايم، مارکس و وئبئر سوسيال دونيانين تحليلي اوچون چوخ موختليف ياناشمالارا صاحيبديرلر. مثلا، دورکهايم و مارکس فردلرين خاريجينده‌کي قوه‌لره اؤنم وئريرکن، وئبئر فردلرين خاريجي دونياداکي ياراديجيليق قابيليتلريني چيخيش نؤقطه‌سي کيمي قبول ائديردي.
مارکس ايقتيصادي پروبلئملرين اؤنمینه باخارکن، وئبئر ايقتيصادياتدان باشقا ديگر اؤنملي عاميللر ايله ماراقلانيردي. وئبئر تاريخين ماتئرياليست تفسيريني و صينيف موباريزه‌سيني رد ائتدي. او ايقتيصادي عاميللرين اهميتيني قبول ائدير آما دوشونجه و اينانجين دا سوسيال دييشيکلييه تاثيريني گؤسترمه‌يه چاليشيبدير. بو ياناشمالارداکي فرقلر سوسيولوژی تاريخينده داوام ائتميشدير.
اساسن کنت، مارکس، دورکهايم و وئبئرين دوشونجه‌لري اساسيندا فورمالاشان سوسيولوژی اوچ پئرسپئکتيوله ايضاح ائديله بيلر: فونکسيوناليزم، توققوشما (کونفلکت) و سيمبوليک ائتکيله‌شيمچي‌ليک.
سون اولاراق کلاسيک سوسيولوژی داها چوخ آنومي، بوروکراتييا، پوزيتيويزم، صينيف، ايجتيماعي همرايليک کيمي مؤوضوعلارلا ماراقلانارکن، موعاصير سوسيولوژی فمينيزم، علم سوسيولوژی‌سی، ديل، تنقيد، ائتنومئتودولوژی، هئگئمونلوق، شهر، يوخسوللوق، پاراديقمالار، دونيويليک، ايستئهلاک کيمي مسئله‌لري اينجله‌يير. پوست‌مودئرن سوسيولوقلار ايسه اينفورماسييا جمعيتي، مدنيت تدقيقي، قلوباللاشما، لئگيتيمليک بؤحراني، ريسک جمعيتي، صنايع سونراسي جمعيتي و ديسکورس(سؤيلم) کيمي مؤوضوعلارلا ماراقلانير.
